RUS
ҚР Мәдениет және спорт министрлігінен мәлім еткендей, іс-шараға әлемнің 70 елінен 800 экспонент және 120 мыңнан астам келуші жиналды. Қазақстандық делегация құрамында отандық туроператорлар, авиакомпаниялар және басқа да бизнес өкілдері болды. Қазақстан стендін Алматы облысының әкімдігі ұйымдастырған.
Іскерлік бағдарламадан басқа, келушілердің назарын стендке аудару үшін ұлттық үлгіде киінген актерлер мен музыканттар шақырылды, қонақтарға ұлттық тағамдар ұсынылды. Бұл көрмені ұйымдастырушылар назарынан тыс қалмаған. Нәтижесінде қазақстандық делегацияның стенд аясындағы іс-шаралары үздік танылып, арнайы сыйлықпен марапатталды.
«SITF сынды ауқымды көрмелерге қатысу Қазақстанға басқа елдерден туристерді тарту үшін өте маңызды. Мысалы, өткен жылы елімізге Оңтүстік Кореядан 16 мың қонақ келді. Осындай стендтермен біз елімізге келушілер санын ұлғайтуды, сондай-ақ әлеуетті туристерді Қазақстанның мәдениеті мен ұлттық дәмімен таныстыруды мақсат етіп отырмыз», - деп атап өтті ҚР МСМ Туризм индустриясы комитетінің төрағасы Дастан Рыспеков.