RUS
Қазір Абай облысында өңірдегі елді мекендерді кең жолақты интернет желісіне қосу үшін «Жол картасы» жобасы әзірленуде. Бұл туралы Көкпекті ауданында аймақ басшысы Нұрлан Ұранхаевтың төрағалығымен өткен көшпелі аппараттық кеңес барысында айтылды.
Облыстық энергетика және ТКШ басқармасының басшысы Болат Әбдіралиевтің айтуынша, лицензиялық келісім аясында облыс әкімдігі электр желісін тарта отырып, 26 антенна-діңгек құрылысын салуды жоспарлап отыр.
Мәселен, ағымдағы жылы Абай, Үржар, Жарма аудандарының ауылдарында 9 АМС құрылысы басталады. Келесі жылы тағы 17 АМС құрылысы жоспарланған, оның 11-інің жобасы дайын (Аягөз, Бесқарағай, Ақсуат аудандарында) және 6 құрылыстың жобасы әзірлену үстінде (Семей қаласына қарасты Ақбұлақ, Абыралы, Қараөлең ауылдық округтері, Бородулиха және Көкпекті аудандары). Сонымен қатар, 4 АМС жеке қаражат есебінен салынады.
Жергілікті әкімдіктердің ақпаратына сүйенсек, облыстағы ауылдық елді мекендердің тек 66,7 пайызында немесе 222-сінде ғана интернет бар (оның ішінде 134 ауыл сымды және мобильді интернетпен қамтамасыз етілген, 75 елді мекенде мобильді интернет, 13 ауылда сымды интернет қолжетімді).