БҚО-да жұмыстан кеш қайтқан жігітті түрмеге жаппақ болды
Ер адам жұмысынан кеш шыққандықтан үйіне ерте жете алмағанын айтты.
SMARTNEWS.KZ басылымының хабарлауынша, Батыс Қазақстан облысында сот пробация қызметінің бас бостандығын шектеу жазасын бас бостандығынан айыру жазасына ауыстыру туралы ұсынысын қанағаттандырмады.
Батыс Қазақстан облысы соттарының ресми Telegram-арнасындағы мәліметке сәйкес, Бәйтерек аудандық соты №1 пробация қызметінің сотталған азаматтың жазасын қатаңдату жөніндегі ұсынымын қарады.
Іс материалдарына сәйкес, пробация қызметі сотталған азаматтың жазаны өтеу тәртібін бұзғанын алға тартқан. Атап айтқанда, ол пробация қызметін ескертпестен әкімшілік-аумақтық бірліктің шекарасынан шыққан және кешкі сағат 22:00-ден кейін тұрғылықты мекенжайында болмаған.
Алайда сот отырысында азамат бұл талаппен келіспейтінін мәлімдеді. Оның айтуынша, қызметтік міндетіне байланысты Орал қаласына тұрақты түрде барып тұруға уәкілетті органның ресми рұқсаты бар. Ол тек бір ғана бұзушылықты мойындап, жұмыстан кеш шыққандықтан үйіне сағат 22:00-ге дейін үлгермегенін түсіндірді.
Сот іс материалдарын зерделей келе, анықталған бұзушылықтардың қасақана әрі жүйелі сипатта емес екенін атап өтті. Сондай-ақ Қылмыстық-атқару кодексінің талаптарына сәйкес, мұндай әрекеттерді өрескел бұзушылық деп тануға негіз жоқ екені көрсетілді.
Бұдан бөлек, сот азаматтың тұрақты жұмысы бар екенін, оң мінездемеге ие екенін, жазасын өтеу кезеңінде әкімшілік немесе қылмыстық құқық бұзушылықтарға жол бермегенін және қоғамнан оқшаулаусыз түзелуге мүмкіндігі бар екенін ескерді.
Осының негізінде сот пробация қызметінің бас бостандығын шектеу жазасын бас бостандығынан айыру жазасына ауыстыру туралы ұсынысын қанағаттандырудан бас тартты.
Сот қаулысы заңды күшіне енді.
Материал авторы
