Ұлттық банк төрағасының орынбасарына 64 мың теңгеден астам айыппұл салынды
Жоғары аудиторлық палата заңсыз төленді деп есептелген сыйақыларды бюджетке қайтаруды талап еткенімен, бұл мерзімінде орындалмаған.
SMARTNEWS.KZ басылымының хабарлауынша, Қазақстан Ұлттық банкі төрағасының орынбасары Әлия Молдабекова қызметкерлерге төленген сыйақыларды бюджетке қайтару туралы Жоғары аудиторлық палатаның нұсқамасын уақытында орындамағаны үшін әкімшілік жауапкершілікке тартылды. Бұл туралы Tengrinews.kz басылымы жазды.
Tengrinews.kz сауалына жауап берген Ұлттық банк Жоғары аудиторлық палатаның нұсқамасының мазмұнын жариялаудан бас тартты. Реттеуші мұны құжаттың құпия сипатымен түсіндірді.
Сонымен қатар, Ұлттық банк Әлия Молдабековаға қатысты шығарылған сот қаулысы әлі заңды күшіне енбегенін мәлімдеді.
Ведомствоның хабарлауынша, Ұлттық банк уәкілетті органдардың актілерін орындау қағидатын басшылыққа алып, нұсқаманы орындау үшін барлық қажетті шараларды қабылдап жатыр. Сондай-ақ ішкі бақылау тетіктері заң талаптары мен құқық қолдану тәжірибесіне сәйкес тұрақты түрде жетілдіріліп келеді.
Даудың мәні неде?
2025 жылдың соңында Жоғары аудиторлық палата Ұлттық банкте мемлекеттік аудит жүргізді. Тексеру барысында қаржы реттеушісінің активтерді пайдалану тиімділігі мен қазақстандықтардың зейнетақы қаражатын басқару тәртібі сараланды.
Аудит қорытындысы бойынша орындауға міндетті нұсқама шығарылып, онда Әлия Молдабековаға 2026 жылдың 1 сәуіріне дейін алтын-валюта резервтерін басқаруға қатысы жоқ қызметкерлерге төленген сыйақыларды бюджетке қайтару тапсырылған.
Алайда белгіленген мерзімде бұл талап орындалмаған.
Әлия Молдабекованың ұстанымы
Сотта Әлия Молдабекова әкімшілік хаттамамен келіспейтінін айтты. Оның сөзінше, сыйақылар Ұлттық банктің заңды шешімдері негізінде төленгендіктен, оларды қызметкерлерден белгіленген мерзімде өндіріп алу мүмкін болмаған.
Ол қызметкерлердің негізсіз баю немесе адал емес әрекет белгілері жоқ екенін, сондықтан төленген қаражатты қайтару тек сот тәртібімен жүзеге асырылатынын атап өтті. Мұндай процесс уақытты қажет етеді әрі талап-арыздардың қанағаттандырылмау қаупі де бар.
Сондай-ақ Ұлттық банк Жоғары аудиторлық палатадан нұсқаманың осы бөлігін орындау мерзімін 2026 жылғы 31 тамызға дейін ұзартуды сұраған.
Осыған байланысты Әлия Молдабекова соттан әкімшілік істі тоқтатуды немесе құқық бұзушылықты болмашы деп тануды өтінген.
Жоғары аудиторлық палатаның ұстанымы
Сот барысында Жоғары аудиторлық палата өкілі Ұлттық банк белгіленген мерзімде нұсқаманы орындау бойынша нақты шаралар қабылдағанын растайтын ақпарат ұсынбағанын мәлімдеді.
Сондай-ақ кейбір хаттар орындау мерзімі аяқталғаннан кейін ғана жолданғаны айтылып, осыған байланысты Әлия Молдабекованы әкімшілік жауапкершілікке тарту сұралды.
Сот қандай шешім шығарды?
Сот Ұлттық банкке нұсқаманы орындау үшін төрт ай уақыт берілгенін атап өтті.
Нәтижесінде Әлия Молдабекова Әкімшілік құқық бұзушылық туралы кодекстің 462-бабының 3-бөлігі («Заңды талаптарды немесе нұсқамаларды орындамау не тиісінше орындамау») бойынша кінәлі деп танылып, оған 64 875 теңге көлемінде әкімшілік айыппұл салынды.
Айта кетейік, Әлия Молдабекова 2019 жылдан бері Қазақстан Ұлттық банкі төрағасының орынбасары қызметін атқарады. Бұған дейін ол үш жыл бойы Ұлттық банктің монетарлық операциялар департаментін басқарған.
Материал авторы
