Ақтауда стоматологқа қаралған 9 жастағы бала жақ сүйегінің бір бөлігінен айырылды

SMARTNEWS.KZ басылымының хабарлауынша, Ақтаудағы стоматологиялық емхананың қабылдауынан кейін 9 жастағы Нұраділ ауыр асқынуға ұшырап, жақ сүйегінің бір бөлігінен айырылған. Қазір бала бірнеше күрделі отадан өтіп, ұзақ ем қабылдап жатыр. Оның анасы кінәлілерді қылмыстық жауапкершілікке тартуды талап етуде. Бұл туралы Lada.kz басылымы жазды.

Баланың анасы Ақмарал Қалжанованың айтуынша, ұлы 2026 жылдың ақпанында Маңғыстау облыстық стоматологиялық емханасына жоспарлы тексерілуге барған.

Оның сөзінше, дәрігерлер емді рентген түсірмей бастаған. Сонымен қатар процедурадан кейін тіс уақытша немесе тұрақты пломбамен жабылмаған.

Анасының айтуынша, келесі қабылдау екі аптадан кейін ғана белгіленген. Кейін ол медициналық құжаттарды қарап, онда ем аяқталды деп көрсетілгенін байқаған.

Кейінгі қабылдаулардан соң баланың беті ісініп, қатты ауыра бастаған. Ақмарал Қалжанованың сөзінше, бастапқыда дәрігерлер ауыз қуысын тұзды сумен шаюға ғана кеңес берген.

Алайда Нұраділдің жағдайы барған сайын нашарлай түскен. Кейін Астанадағы дәрігерлер оған остеомиелитдиагнозын қойып, төменгі жақ сүйегінің қатты зақымданғанын анықтаған.

Қазіргі уақытта балаға екі операция жасалған. Алда тағы бір хирургиялық ота күтіп тұр.

Нұраділ әзірге тек ұсақталған тағаммен ғана қоректенеді. Асқыну қаупіне байланысты оған жүгіруге, секіруге және белсенді ойындармен айналысуға тыйым салынған. Дәрігерлердің айтуынша, жақ сүйегін толық қалпына келтіру баланың жасы ұлғайғаннан кейін ғана мүмкін болады.

Отбасының шағымынан кейін Маңғыстау облыстық денсаулық сақтау басқармасы қызметтік тексеру жүргізіп, анықталған заңбұзушылықтарға байланысты екі стоматологқа сөгіс жариялаған.

Алайда баланың анасы мұндай жаза келтірілген зардапқа сай келмейді деп есептейді. Ол Маңғыстау облысы Полиция департаментіне арыз беріп, кінәлілерді қылмыстық жауапкершілікке тартуды талап еткен.

Әзірге бұл іс бойынша сотқа дейінгі тергеп-тексерудің басталғаны туралы ресми ақпарат жарияланған жоқ.