Үш жыл бойы іздеуде жүрген алаяқ Алматыда бет-әлпетті тану жүйесі арқылы ұсталды
2023 жылы пробациялық бақылаудан қашып кеткен күдікті Алматыдағы супермаркеттердің бірінде камераға түсіп қалған.
SMARTNEWS.KZ басылымының хабарлауынша, үш жыл бойы құқық қорғау органдарынан жасырынған қарағандылық ер адам Алматыда заманауи бейнебақылау жүйесінің көмегімен ұсталды. Ол аса ірі көлемдегі алаяқтық жасағаны үшін іздеуде болған. Бұл туралы Polisia.kz басылымы жазды.
37 жастағы ер адамға қатысты іздеу шаралары үш жылға созылған. Тергеу мәліметінше, ол жәбірленушіге 44 миллион теңгеден астам материалдық шығын келтірген.
Сот шешіміне сәйкес, күдікті бұған дейін пробациялық бақылауда болған. Алайда 2023 жылы тұрғылықты мекенжайын өз бетінше тастап, белгісіз бағытқа кетіп қалған. Осыдан кейін ол құқық қорғау органдарынан бой тасалаған.
Полиция оның ізін үзбей бақылауда ұстаған. Жедел ақпарат нәтижесінде ер адамның Алматы қаласында жүргені анықталған.
Қызығы, оны ұстау үшін арнайы ұзақ операция жүргізудің қажеті болмаған. Іздеуде жүрген азаматтың заң алдындағы жасырын өмірі бір супермаркетке барған кезде аяқталды.
Ол сол жерде қалалық бейнебақылау жүйесінің камерасына түсіп қалған. Бет-әлпетті тану технологиясы мен нейрожелі мүмкіндіктері арқылы оның бейнесі іздеуде жүрген адамдар базасымен салыстырылып, жеке тұлғасы анықталған.
Жүйеден түскен белгі бойынша полиция қызметкерлері дереу әрекет етіп, қарағандылық ер адамды ұстады. Жеке басы құжаттар арқылы расталғаннан кейін ол Қарағанды облысы полиция департаментінің қызметкерлеріне тапсырылып, туған қаласына жеткізілді.
Қазіргі уақытта ер адам қамауда отыр және сот шешімін күтуде. Алдағы уақытта оған қатысты бұрынғы пробациялық бақылау туралы шешімді жою және жазаның қалған бөлігін бас бостандығынан айыру түрінде өтеу мәселесі қаралады.
Материал авторы
