Таиланд билігі бауырларды өлтіргендерге ең қатаң жаза берілетініне уәде етті

SMARTNEWS.KZ басылымының хабарлауынша, Таиланд премьер-министрі Анутхин Чанвиракун Паттайяда қаза тапқан ресейлік ағалы-қарындас Диана мен Роман Назимовтардың өліміне байланысты ресми түрде кешірім сұрады. Үкімет басшысы бұл істі жеке бақылауына алатынын және кінәлілер заң аясында ең қатаң жазаға тартылатынын мәлімдеді. 

Премьер-министрдің айтуынша, бұл қылмыс Таиландтың халықаралық беделіне елеулі нұқсан келтірген. Сондықтан билік мұндай қайғылы оқиғалардың қайталануына жол бермеу үшін барлық қажетті шараны қабылдайды.

Анутхин Чанвиракун Паттайяға арнайы барып, қылмыс болған жерді және полиция бөлімшесін аралаған.

«Болған оқиға үшін кешірім сұраймыз», – деді ол журналистерге.

Сондай-ақ премьер-министр марқұмдардың туыстарына жан-жақты қолдау көрсетілетінін айтты. Қазір олардың анасы Таиландта жүр.

Ресейдің Таиландтағы елшілігінің консулдық бөлімінің меңгерушісі Илья Ильин елшілік істің жан-жақты тергеліп, кінәлілердің әділ жаза алуына үміттенетінін жеткізді. Сонымен қатар дипломатиялық өкілдік қаза болғандардың анасына барлық қажетті көмекті көрсететінін мәлімдеді.

Еске салсақ, бұған дейін Таиланд полициясы 22 жастағы Диана Назимова мен оның 17 жастағы інісі Романның жоғалып кетуіне байланысты екі күдіктіні ұстаған болатын. Олар – 43 жастағы Тхан мен 39 жастағы Тхонгчай.

31 шілдеде күдіктілер ағалы-қарындасты өлтіргендерін мойындады. Тергеудің алдын ала мәліметінше, олар бастапқыда жастардың мотоциклін ұрламақ болған. Алайда Диана мен Роман қарсылық көрсеткеннен кейін қылмысқа барған.

Айта кетейік, Диана мен Роман 25 шілдеден 26 шілдеге қараған түні Паттайяда скутермен үйден шығып кеткеннен кейін із-түзсіз жоғалған еді. Анасының айтуынша, бұған дейін қызы өзін біреудің аңдып жүргенін айтқан. Бірнеше күннен кейін полиция жерге көмілген скутерді тапқанымен, жастардың ізі бірден анықталмаған болатын.