RUS
Бұл туралы өңірлік коммуникациялар қызметінің алаңында өткен баспасөз мәслихатында Алматы қаласы Әділет департаментінің өкілдері айтты, деп хабарлайды ҚазАқпарат тілшісі.
Алматы қалалық Әділет департаментінің тіркеу қызметі саласындағы бақылау бөлімі басшысының міндетін атқарушы Жанар Бейсенованың сөзінше, ХҚКО-да азаматтық хал актілерін тіркеуге байланысты мемлекеттік қызметтердің барлық түрлері көрсетілетін болады.
«Осылайша, азаматтардың барлық мемлекеттік қызметтерді бір жерден «бір терезе» қағидаты бойынша алу мақсатында барлық халыққа қызмет көрсету орталықтары бірыңғай жүйеге біріктірілген», - деді департамент өкілі.
Сондай-ақ, ол көрсетілетін мемлекеттік қызметтерге тоқталды.
«Көрсетілетін мемлекеттік қызметтерге бірқатар функция жатады. Атап айтар болсақ, неке қию және бұзуды, өлімді мемлекеттік тіркеу, акт жазбаларына өзгерістер, толықтырулар, түзетулер енгізу, оның ішінде атын, әкесінің атын, тегін өзгерту, әкелікті (анасы екенін) анықтау, бала асырап алу бар. Сонымен қатар азаматтық хал актілерінің жазбаларын қалпына келтіру және жою, бастапқы және қайталама куәліктерді, анықтамаларды электрондық нұсқада немесе қағаз түрінде беру»,- деп түсіндірді Жанар Бейсенова.
Әділет департаментінің тіркеу қызметі саласындағы бақылау бөлімінің жетекші маманы Сара Мұрзиева жеке өмір, жеке және отбасылық құпия заңмен қорғалатынын атап өтті.
Сондай-ақ азаматтардың жеке және отбасылық өмірі туралы мәліметтерді жария еткені үшін жауапкершілік бар екенін еске салды.
«Тіркеуші органдардың қызметкерлері асырап алушының келісімінсіз асырап алу туралы қандай да бір мәліметтерді хабарлауға және асырап алушылардың асырап алынған баланың ата-анасы болып табылмайтындығы туралы ақпаратты қамтитын құжаттарды беруге құқы жоқ. Бұл мәселе қатаң бақылауда», - деп қорытындылады Сара Мұрзиева.