ФИФА президенті Инфантино көпшілік алдында кешірім сұрады
FIFA даудан кейін тексеріс жүргізіп, есеп беруге уәде етті.
SMARTNEWS.KZ басылымының хабарлауынша, Марокконың Рабат қаласында Халықаралық футбол федерациясының (FIFA) жоғары кеңесінің отырысы өтті. Жиын қорытындысында ұйым басшылығы президент Джанни Инфантиноға қолдау білдіріп, оның FIFA-ға мүше 211 ұлттық қауымдастық сайлаған жалғыз лауазымды тұлға екенін атап өтті.
Отырыстың басты жаңалығы – Джанни Инфантино мен оның көмекшілерінің көпшілік алдында кешірім сұрауы болды.
FIFA мәлімдемесінде ұйым жіберілген қателіктер үшін шынайы өкініш білдіріп, мұндай жағдайдың енді қайталанбауына кепілдік беруге тырысатынын мәлімдеді.
Сондай-ақ ұйым ішкі тексеріс жүргізіліп, оның нәтижелері FIFA кеңесінің келесі жоспарлы отырысында ұсынылатынын хабарлады.
Сонымен қатар федерация жоба жабылғаннан кейін өзінің адалдығына, тиімді басқару қағидаттарына және белгіленген рәсімдерді сақтауына күмән келтіретін айыптауларға бұдан былай жол бермейтінін, қажет болған жағдайда өз беделін қорғау үшін барлық заңды шараларды қабылдайтынын жеткізді.
FIFA өкілдері әрбір жағдайдан сабақ алу маңызды екенін айтып, осы тәжірибені ескере отырып, ұйымдағы жұмыс процестерін жетілдіруді жалғастыратынын атап өтті. Сонымен бірге олар барлық қабылданған шешімдер FIFA-ның қолданыстағы нормативтік-құқықтық базасына толық сәйкес жүзеге асырылғанын мәлімдеді.
Жиын барысында FIFA-ның басқарушы құрылымдары арасындағы өзара іс-қимылды, коммуникацияны және басқару процестерін тиімдірек ету мәселесі де талқыланып, оларды жетілдіру туралы ортақ келісімге қол жеткізілді.
Әлем чемпионатының коммерциялық құқықтарын сатуға қатысты дау шамамен он күн бұрын ақпарат құралдарына жария болғаннан кейін халықаралық деңгейде үлкен сынға ұшырады. Жоба футбол қауымдастығы тарапынан қолдау таппай, кейбір конфедерациялар бойкот жариялау қаупін көтерген соң, Джанни Инфантино бұл бастамадан бас тарту туралы шешім қабылдады.
Материал авторы
