Даулы мәлімдемелерден кейін ресейлік стример Қазақстаннан шығарылды
Қазақтарға тіл тигізген стример ел аумағынан мәжбүрлі түрде шығарылды.
SMARTNEWS.KZ басылымының хабарлауынша, Астана полициясы ресейлік стримердің Қазақстан аумағынан шығарылған сәтін көрсететін видеоны жариялады. Шетелдік азамат әлеуметтік желідегі даулы мәлімдемелерінен кейін әкімшілік жауапкершілікке тартылып, сот шешімімен елден шығарылған.
Полицияның мәліметінше, стримердің ісі сотта қаралғаннан кейін оны Қазақстаннан шығару туралы шешім қабылданған. Бұған әлеуметтік желілерде жариялаған арандатушылық сипаттағы және орынсыз мәлімдемелері себеп болған.
Сот шешімінен кейін ресейлік азамат Қазақстан аумағынан кеткен. Сонымен қатар оған Қазақстанға бес жыл бойы кіруге тыйым салынды.
«Заң талаптары мен елге деген құрмет – ешкімге ерекшелік жасамай, барлығы үшін міндетті», – деп мәлімдеді полиция.
Ресейлік стримердің Қазақстан туралы эфирлерде айтқан сөздері бұған дейін елдің әлеуметтік желі кеңістігінде қызу талқыланған. Қолданушылар оның мәлімдемелеріне наразылық білдіріп, кейін құқық қорғау органдарының оған қатысты шара қолданғаны белгілі болған.
Осылайша, сот шешімі бойынша шетелдік азамат әкімшілік жауапкершілікке тартылып қана қоймай, Қазақстан аумағынан шығарылды және елге қайта кіруіне бес жылға шектеу қойылды.
Материал авторы
