Шетелдік брендтерде жұмыс істеген танымал модель Ұлттық ұланда қызмет етіп жүр

SMARTNEWS.KZ басылымының хабарлауынша, 17 жасында модельдік мансабын бастаған Шыңғыс Таңатпаев әлемдік брендтердің киімдерін көрсетіп, халықаралық подиумдарда жүрді. Қазір ол Қарағандыдағы әскери бөлімде Отан алдындағы борышын өтеп, қоғамдық қауіпсіздікті қамтамасыз етуге атсалысып жүр.

Шыңғыс Таңатпаевтың өміріндегі сән индустриясындағы кезең қазір әскери қызметпен алмасқан. Қарағандыдағы 5451 әскери бөлімінің қатардағы жауынгері бұған дейін халықаралық сән подиумдарында өнер көрсеткен.

Ол модельдік мансабын 17 жасында бастаған. Бойы мен келбеті сән саласына жол ашып, көп ұзамай халықаралық деңгейдегі жобаларға қатыса бастаған.

Шыңғыс Францияның әйгілі Pierre Cardin сән үйінің, сондай-ақ Италияның Federico Barrazzo және Sauvage Multi брендтерінің киімдерін таныстырған. Модель ретінде түрлі елдерде болып, сән көрсетілімдеріне қатысқан.

Қазір оның күнделікті өміріндегі басты киім — әскери форма. Подиумдағы сенімді қадамның орнына әскери саптағы тәртіп келген.

Модельдік мансап пен әскери қызмет бір-бірінен алшақ көрінгенімен, сарбаздың өзі бұл екі саланың ортақ тұсы бар екенін көрсетіп жүр. Ол — тәртіп, жинақылық және өз ісіне жауапкершілікпен қарау.

Қазір қатардағы жауынгер Қарағандыдағы қоғамдық қауіпсіздікті қамтамасыз етуге қатысады. Ол бұқаралық іс-шаралар мен адам көп жиналатын орындарда қоғамдық тәртіпті сақтауға жұмылдырылады.

Қызмет барысында тұрғындармен тікелей байланысатын кездері де аз емес. Сарбаз ата-анасынан адасып қалған балаларды тауып, оларды жақындарына жеткізуге, сондай-ақ тұрғындардың жоғалған бағалы заттарын қайтаруға көмектескен.

Яғни кеше ғана сән әлеміндегі брендтерді таныстырған Шыңғыс бүгін ел ішіндегі тыныштық пен тәртіпті күзетіп жүр.

Айта кетейік, бүгінде 7 мыңнан астам Ұлттық ұлан әскери қызметшісі еліміздің 21 қаласында қоғамдық тәртіпті қамтамасыз етеді. Ал Қарағандыда бұл міндетті орындауға күн сайын 250-ден астам сарбаз тартылады.