Динара Сатжан емші Бағдагүлге қарсы тағы бір сотта жеңіске жетті

SMARTNEWS.KZ басылымының хабарлауынша, ақтөбелік емші Бағдагүл Лепесова журналист Динара Сәтжанды көпшілік алдында қорлағаны үшін кінәлі деп танылды. Сот оған 30 АЕК көлемінде айыппұл тағайындағанымен, амнистияға байланысты негізгі жазадан босатты. 

Динара Сәтжан актөбелік емші Бағдагүл Лепесоваға қарсы іс бойынша сотта жеңіске жетті. Бұл туралы 19 тамызда журналистің адвокаты Рена Керимова мәлімдеген.

Астана қаласының мамандандырылған ауданаралық сотының судьясы Аманжолов Лепесованы ҚР Қылмыстық кодексінің 131-бабы 2-бөлігі бойынша, яғни Динара Сәтжанды көпшілік алдында қорлағаны үшін кінәлі деп таныды.

Сот емшіге 30 АЕК көлемінде айыппұл тағайындады. Алайда жақында қабылданған рақымшылыққа байланысты Лепесова негізгі жазадан босатылды.

Сонымен бірге сот одан заң көмегіне, филологиялық сараптамаға және нотариус қызметіне кеткен шығындарды толық көлемде өндіріп алуды ұйғарды.

Дау қалай басталды?

Жанжал бірнеше ай бұрын Динара Сәтжанның Ақтөбеге жеке бренд туралы форум өткізу үшін баруынан кейін өршіген.

Осыдан соң Бағдагүл Лепесова журналист туралы бірнеше эмоциялық видео жариялап, оның атына ауыр сөздер айтқан. Бейнематериалдарда ол Сәтжанды балағаттап, ар-намысына тиетін сөздер қолданған.

Динара Сәтжан бұл жағдайдан кейін полицияға жүгінген. Нәтижесінде Лепесоваға қатысты қылмыстық іс қозғалды.

Қорғау тарапының тосын уәжі

Сот отырыстарының бірінде қорғау тарапы күтпеген ұстаным білдірген. Динара Сәтжанның айтуынша, Лепесова өзін журналистің кім екенін білмеймін деп түсіндірген.

Тіпті қорғаушы тараптың бірі: «Сіз өзіңізді Динара Сәтжан деп нақты неге ойлайсыз?» деген сауал қойған.

Осылайша қорғау тарапы әлеуметтік желіде жарияланған видеолардағы сөздер нақты Динара Сәтжанға қатысты айтылды дегенді жоққа шығаруға тырысқан.

Журналист мұндай ұстанымды күтпеген жағдай деп бағалаған. Оның сөзінше, кешірім сұраудың орнына тараптар өзара таныс болмағанын және айтылған ауыр сөздердің басқа адамға бағытталғанын алға тартуға тырысқан.

Сәтжан: «Қорласа, дәлелді тіркеп алыңыз»

Сот шешімінен кейін Динара Сәтжан адвокаты Рена Керимовамен бірге істі жеңгенін хабарлады.

Журналист әлеуметтік желідегі жазбасында қорлыққа тап болған адамдарға мұндай жағдайды құжаттап, сотқа жүгінуге кеңес берген.

Осылайша сот Лепесованың журналисті көпшілік алдында қорлағанын дәлелденген деп таныды. Алайда тағайындалған айыппұлға қарамастан, емші амнистияның қолданылуына байланысты негізгі жазадан босатылды.