Apple тарихындағы алғашқы бүктелмелі iPhone-ды таныстырды
256 ГБ жады бар базалық нұсқаның бағасы 1999 доллар болып, алдын ала тапсырыс 16 қазанда қабылдана бастайды.
SMARTNEWS.KZ басылымының хабарлауынша, Apple компаниясы өз тарихындағы алғашқы бүктелмелі смартфон – iPhone Duo моделін таныстырды. Жаңа құрылғы екі экранмен жабдықталған және компанияның қазіргі iPhone желісіндегі ең қымбат модель атанды.
iPhone Duo бүктелген кезде пайдаланушыға диагоналі 5,4 дюйм болатын сыртқы экранды ұсынады. Құрылғы толық ашылғанда ішкі 7,6 дюймдік дисплей іске қосылады. Смартфон бірнеше қосымшаны бір уақытта пайдалануға мүмкіндік береді. Сонымен қатар жаңа модель Apple Pencil қаламын қолдайды.
Құрылғыға A20 Pro процессоры орнатылған. Негізгі камера жүйесі 48 мегапиксельді екі камерадан тұрады. Touch ID саусақ ізін тану технологиясы бүйірдегі батырмаға кіріктірілген. Смартфонда физикалық SIM картасының орнына eSIM қолданылады.
iPhone Duo ақ және қара түсте шығарылады. 256 ГБ жады бар базалық нұсқасының бағасы 1999 долларды құрайды. Алдын ала тапсырыс 16 қазанда ашылып, смартфон 23 қазаннан бастап сатылымға шығады.
Apple таныстырылым барысында iPhone 18 Pro және iPhone 18 Pro Max модельдерін де көрсетті. Екі смартфон да A20 Pro чипімен жабдықталған. Жаңартылған камераларында реттелетін диафрагма қарастырылған. Сонымен қатар құрылғыларға жасанды интеллект негізіндегі жаңа функциялар енгізіліп, батареяның автономды жұмыс уақыты ұлғайтылған.
iPhone 18 Pro бағасы 1199 доллардан басталады. Ал iPhone 18 Pro Max-тың бастапқы құны – 1299 доллар. Екі модель де 18 қыркүйектен бастап сатылымға түседі.
Материал авторы
