Ким Чен Ын Путинге хат жолдап, Ресеймен байланысты тереңдетуге уәде берді
Ким Чен Ын Ресейдің Украинадағы соғысын «қасиетті соғыс» деп атап, Мәскеуге қолдауын білдірді.
SMARTNEWS.KZ басылымының хабарлауынша, Солтүстік Корея басшысы Ким Чен Ын Ресеймен стратегиялық ынтымақтастықты жан-жақты кеңейтуге және Мәскеуге қолдау көрсетуге дайын екенін мәлімдеді. Ол бұл туралы Ресей президенті Владимир Путинге жолдаған хатында жазған. Бұл туралы Reuters агенттігі жазды.
Хат Путиннің Солтүстік Кореяның құрылғанына 78 жыл толуына орай Ким Чен Ынға жолдаған құттықтауына жауап ретінде жіберілген.
Ким Чен Ын Пхеньян мен Мәскеу арасындағы стратегиялық ынтымақтастықты «жан-жақты» кеңейтіп, тереңдету қажеттігін атап өткен. Оның айтуынша, екі ел арасындағы қарым-қатынас достық, өзара көмек және одақтастық міндеттемелер негізінде одан әрі дамуы тиіс.
Солтүстік Корея басшысы хатында Ресейдің Украинаға қарсы соғысын «қасиетті соғыс» деп сипаттап, Мәскеудің «жеңісіне» сенетінін білдірген. Reuters бұл тіркес Мәскеудің Украинаға қарсы толық ауқымды басып кіруіне қатысты айтылған болуы мүмкін екенін атап өтті.
Ким Чен Ын Путинге және Ресей халқына Пхеньянның «мызғымас қолдауын» көрсететініне сендірді.
Соңғы жылдары Ресей мен Солтүстік Корея арасындағы әскери және геосаяси байланыстар айтарлықтай күшейді. Екі ел өздерінің одақтастық қарым-қатынасын ашық түрде мәлімдеп, әскери саладағы өзара ықпалдастықты кеңейтіп келеді.
Ким Чен Ын бұдан бір күн бұрын Қытай төрағасы Си Цзиньпинге де хат жолдаған. Ол онда Пхеньянның Бейжіңмен дәстүрлі қарым-қатынасты дамытуға және екіжақты ынтымақтастықты тығыз сақтауға дайын екенін жеткізген.
Материал авторы
