Алматы облысында әйел екі итті балтамен ұрған
Көршілер арасындағы жанжал иттерге қатігездік көрсетуге ұласқан.
SMARTNEWS.KZ басылымының хабарлауынша, Алматы облысындағы «Пчелки» саяжай алабында жарақат алған екі итті волонтерлер құтқарып қалды. Жануарларды жергілікті тұрғындар бұталардың арасынан тауып, олардың жарақат алғанын хабарлаған. Бұл туралы КТК телеарнасы жазды.
Зооқорғаушылар мен жергілікті тұрғындардың айтуынша, иттерге балтамен шабуыл жасалған болуы мүмкін. Жануарлар далада жүрген, ал саяжай тұрғындары оларды ара-тұра тамақтандырып отырған.
Волонтер Александра Савоськина иттерді түнде ветеринарлық клиникаға жеткізген. Жануарлардың бірі, бір жастағы Пацан есімді иттің жағдайы ауыр болған. Ветеринарлар тексеру барысында бас сүйегіне зақым келгенін анықтап, оның денсаулығын қосымша бағалау үшін МРТ жасауды жоспарлаған.
Ветеринар Юрий Смоляковтың айтуынша, иттің бас сүйегіндегі жарақаттар оның жүйке жүйесіне қатысты асқынуларға әкелуі мүмкін. Сондықтан жануардың жағдайын толық анықтау үшін қосымша зерттеу қажет.
Оқиғадан кейін саяжай тұрғындары мен волонтерлер полицияға жүгінген. Олардың сөзінше, жануарларға шабуыл жасады деп болжанған әйел оқиға орнына келген полиция қызметкерлерінің көзінше өз әрекетіне қатысты мәлімдеме жасаған.
Алматы облысы полиция департаментінің мәліметінше, жанжалға көршілер арасындағы иттердің үй құстарына шабуыл жасауы себеп болған. Ведомство жүргізген тексеру қорытындысында әйел көршілеріне тиесілі иттерге дене жарақатын салғаны анықталған.
Полиция әйелді жануарларға қатыгездік көрсеткені үшін жауапкершілікке тартқан. Жанжалға қатысушылармен профилактикалық әңгіме жүргізіліп, заң талаптары түсіндірілген. Сондай-ақ тараптарға даулы мәселелерді бейбіт жолмен шешу қажеттігі ескертілген.
Материал авторы
