БҚО-да өрт сөндіруші анасының жерленген күні қызмет үстінде қаза тапты

SMARTNEWS.KZ басылымының хабарлауынша, Батыс Қазақстан облысының Жәнібек ауданында құрғақ шөпті сөндіру кезінде 32 жастағы өрт сөндіру бөлімінің взвод командирі Миршат Халиуллин қаза тапты. Ол қызметтік міндетін атқару кезінде көз жұмған. 

Қайғылы оқиға 3 қыркүйекте «Татран» қыстауы маңында болған. Төтенше жағдайлар министрлігі өрт сөндірушінің қызметтік міндетін орындау кезінде қаза болғанын растады.

Марқұмның туысы Алтай Бақтығалиев әлеуметтік желідегі жазбасында Миршат Халиуллиннің өмір жолы туралы айтып берді. Оның мәліметінше, Миршат 1994 жылы Жәнібек ауданында дүниеге келген. Әкесі Марс жүргізуші болып еңбек етсе, анасы Анаргүл медбике болған.

Миршат төрт жасында анасынан айырылған. Содан кейін оны әкесі тәрбиелеген. Арнайы оқу орнын тәмамдаған соң ол Үшжөнкел ауылдық округі әкімінің аппаратында статист болып жұмыс істеп, кейін аудандық өрт сөндіру бөліміне қызметке келген.

Туысының айтуынша, Миршат қарапайым, мейірімді әрі еңбекқор адам болған.

Қайғылы оқиғаның тағы бір ауыр тұсы – өрт сөндірушінің қаза болған күні анасының жерленген күнімен сәйкес келген. Алтай Бақтығалиев бұл жайтты марқұмның өміріндегі қасіретті сәйкестік деп атады.

«Миршат төрт жасында анасынан айырылды. Жылдар өткен соң дәл сол күні өзі де өмірден өтті. Бұл жақындары үшін орны толмас қаза», – деп жазды ол.

Марқұмның туысы өрт сөндірушілердің еңбегіне қоғам назарын аударуды сұрады. Оның сөзінше, бұл сенсация іздеу емес, қызметтік міндетін атқарып қаза тапқан адамның есіміне құрмет көрсету.

«Өрт сөндіруші – жай ғана мамандық емес. Өзгелер қауіптен қашқан сәтте, ол қауіпке қарай барады», – деді Бақтығалиев.

Отбасы Жәнібек аудандық төтенше жағдайлар бөлімі мен №21 өрт сөндіру бөлімінің ұжымына көрсеткен қолдауы үшін алғыс білдірді.

Төтенше жағдайлар министрлігі марқұмның отбасына қажетті көмек көрсетілгенін, соның ішінде жерлеу рәсімін ұйымдастыруға жәрдемдескенін хабарлады. Ведомство қызметтік міндетін атқару кезінде қаза тапқан мамандардың еңбегін жоғары бағалап, олардың есімін құрметпен еске алатынын мәлімдеді.