Бали аралында қазақстандық әйел жезөкшелікке қатысты күдікпен ұсталды

SMARTNEWS.KZ басылымының хабарлауынша, Индонезияның иммиграциялық қызметі Бали аралында жүргізілген арнайы операция барысында 13 шетел азаматын ұстады. Олардың арасында Қазақстан азаматы да бар. Билік ұсталғандарды жезөкшелікпен байланысты қызметке қатысы болуы мүмкін деген күдікпен тексеріп жатыр. Бұл туралы Antara агенттігі жазды.

Операция 17 қыркүйек кешке Бали аралындағы туристер көп баратын Чангу, Семиньяк және Умалас аудандарында өткен.

Чангу ауданында Ресей азаматы мен Украина азаматы ұсталған. Иммиграциялық қызмет өкілдерінің мәліметінше, ресейлік әйелдің тұруға арналған рұқсат құжатын секс-қызмет көрсетуге пайдалану мүмкіндігі тексеріліп жатыр. Ал Украина азаматына жезөкшелікке жәрдемдесті деген күдік келтірілген. Билік оның тұруға рұқсат құжатының мерзімі өтіп кеткенін анықтағанымен, қашықтан жұмыс істеуге арналған жеке рұқсаты 2026 жылдың 8 қарашасына дейін жарамды болған.

Семиньяк ауданында иммиграциялық қызмет онлайн платформаларға жүргізілген мониторингтен кейін вилланы бақылауға алған. Нәтижесінде Нигерияның үш азаматы ұсталды. Олардың тағылымдама бағдарламасы бойынша елде болуға берілген рұқсаттарының мерзімі 58, 94 және 134 күнге өтіп кеткені анықталған.

Умалас ауданында тағы төрт әйел ұсталды. Иммиграциялық қызмет өкілдері олардың үшеуі Ресей азаматы, біреуі Қазақстан азаматы екенін хабарлады. Билік бұл адамдарды Telegram желісіндегі ақпарат негізінде бақылауға алған вилладан анықтаған.

Сол ауданда кейін тағы төрт Нигерия азаматы ұсталып, олардың тұруға арналған рұқсат құжаттарын заңсыз пайдаланған болуы мүмкін екені тексеріліп жатыр.

Осылайша операция барысында барлығы 13 шетел азаматы ұсталды. Олардың 12-сі – әйел, біреуі – ер адам.

Нгурах-Рай иммиграциялық басқармасының басшысы Мұхамад Новиандридің айтуынша, шетел азаматтарына қатысты алғашқы ақпарат жергілікті тұрғындардан түскен. Кейін мәліметтер далалық тексеру, жасырын бақылау және онлайн платформаларға мониторинг жүргізу арқылы зерттелген.

Қазір ұсталған 13 адамның барлығы Нгурах-Рай иммиграциялық басқармасында жауап беріп жатыр.

Билік олардың Индонезияның 2011 жылғы иммиграция туралы заңының 75-бабын бұзуы мүмкін екенін, сондай-ақ өзге де құқық бұзушылықтарға қатысы болуы ықтимал екенін мәлімдеді. Кінәлілігі сотта немесе тиісті тергеу барысында анықталуы тиіс.

Егер заң бұзушылықтар расталса, шетел азаматтарына депортация жасалып, Индонезияға бес жылға дейін кіруге тыйым салынуы мүмкін. Сонымен қатар билік қылмыстық іс қозғау мүмкіндігін де қарастырып жатыр.

Бали иммиграциялық басқармасының өңірлік басшысы Рамдхани операция аралдағы шетел азаматтарының елде болу тәртібі мен қызметін бақылауды күшейту жұмыстарының бір бөлігі екенін айтты.