Қостанай облысында бала күтуші үй иесінің 310 мың теңгелік әшекейін ұрлап кеткен
Сот күдіктінің кінәсін толық мойындағанын және бұған дейін қылмыстық жауапкершілікке тартылмағанын ескерді.
SMARTNEWS.KZ басылымының хабарлауынша, Қостанай облысының Жітіқара ауданында бала қарауға жалданған жас қыз үй иесінің зергерлік бұйымдарын ұрлағаны үшін сотталды. Сот оған 200 сағат қоғамдық жұмыс жазасын тағайындады. Бұл туралы Қостанай облысының соттары жазды.
Сот анықтағандай, оқиға 2026 жылғы 26 тамызда Жітіқара қаласында болған. Балаға қарау міндетін атқарып жүрген қыз жәбірленушінің пәтерінде болған кезде балалар бөлмесінен 585 сынамалы екі жұп сырғаны жасырын алып кеткен.
Ұрланған әшекейлердің жалпы құны 310 мың теңгені құрап, үй иесіне материалдық шығын келген. Күтуші зергерлік бұйымдарды өз қалауынша жұмсаған.
Сот отырысында сотталушы кінәсін толық мойындап, жасаған әрекетіне өкінетінін айтты.
Жаза тағайындау кезінде сот қыздың шын жүректен өкінгенін, денсаулық жағдайын, бұрын қылмыстық жауапкершілікке тартылмағанын және жас екенін ескерді. Сондай-ақ келтірілген шығынның бір бөлігін өтегені жеңілдететін мән-жай ретінде қаралған.
Сот қылмыстық жауапкершілікті ауырлататын мән-жайларды анықтамаған.
Істің мән-жайын, құқық бұзушылықтың сипаты мен қоғамдық қауіптілік деңгейін және сотталушының жеке басын ескере отырып, сот оған 200 сағат қоғамдық жұмыс түріндегі жаза тағайындады.
Сот үкімі әзірге заңды күшіне енген жоқ.
Материал авторы
