Астанада Zeekr автобусты соқты: төрт адам ауруханаға жеткізілді
Жол апаты кезінде Zeekr көлігінің жүргізушісі мен жолаушысы, сондай-ақ автобустың екі жолаушысы медициналық көмекке жүгінген.
SMARTNEWS.KZ басылымының хабарлауынша, Астанада Zeekr электромобилі мен Yutong қалалық автобусы соқтығысып, төрт адам медициналық мекемеге жеткізілді. Бұл туралы Астана қаласы Полиция департаментінің баспасөз қызметі жазды.
Жол-көлік оқиғасы 29 қыркүйекте Мәңгілік Ел даңғылы мен Хусейн бен Талал көшесінің қиылысында болған.
Полицияның мәліметінше, Zeekr көлігі Қабанбай батыр даңғылы бағытынан келе жатқан. Жүргізуші бағдаршамның рұқсат беретін сигналына солға бұрылған кезде қарсы бағытта қозғалып келе жатқан Yutong автобусына жол бермеген. Салдарынан екі көлік соқтығысқан.
Апаттан кейін Zeekr жүргізушісі мен оның жолаушысы, сондай-ақ автобуста болған екі жолаушы ауруханаға жеткізілді.
«Жол-көлік оқиғасы салдарынан Zeekr автокөлігінің жүргізушісі мен жолаушысы, сондай-ақ автобустың екі жолаушысы медициналық мекемеге жеткізілді», – деп хабарлады полиция.
Соқтығысқан Zeekr коммуналдық тұраққа қойылды. Қазір жол апатына қатысты тексеру жүргізіліп, оқиғаның барлық мән-жайы анықталып жатыр.
Материал авторы
