«Додо Пицца» деректерінің жаппай таралуы: хакерлер қазақстандық клиенттер туралы мәлімдеді

SMARTNEWS.KZ басылымының хабарлауынша, халықаралық «Додо Пицца» желісінің IT жүйесіне жасалған кибершабуылдан кейін миллиондаған клиенттің жеке деректері хакерлердің қолына түсуі мүмкін. Шабуыл жасағандар арасында Қазақстандағы клиенттердің ақпараты да бар екенін мәлімдеді. 

Компанияның өзі 28 қыркүйекте ақпараттық жүйесіне екі күн қатарынан кибершабуыл жасалғанын растаған.

«Додо Пиццаның» мәліметінше, шабуыл салдарынан клиенттердің бір бөлігінің аты-жөні, мекенжайы, электронды поштасы, телефон нөмірі, туған күні және жасаған тапсырыстары туралы ақпарат қолжетімді болуы мүмкін.

Компания төлем деректерін сақтамайтынын, сондықтан банк карталарына қатысты ақпараттың қауіпсіз екенін мәлімдеді. Оқиға туралы Ресейдің дербес деректерді қорғау жөніндегі уәкілетті органына хабар берілген. Компания сондай-ақ шабуылдаушылардың жүйеге қолжетімділігін бұғаттағанын және ішкі тексеру жүргізіліп жатқанын айтты.

Ал «База» Telegram-арнасының мәліметінше, компанияға корпоративтік жүйелерді бұзумен айналысатын хакерлер тобы шабуыл жасаған. Шабуылдаушылардың қолына 65 миллион бірегей клиентке қатысты дерек пен бірнеше терабайт көлеміндегі ақпарат түсуі мүмкін деген ақпарат тарады.

Қазақстандық клиенттердің деректеріне қатысты жағдай әзірге нақты емес. «Додо Пицца» Қазақстандағы клиенттер базасына хакерлердің кіргенін ресми түрде растаған жоқ. Компанияның қолдау қызметі Digital Business басылымына клиенттер туралы деректердің елдер бойынша бөлінетінін хабарлаған. Ал алдын ала мәлімет бойынша, Қазақстан клиенттерінің деректерінің таралғаны анықталмаған.

Дегенмен хакерлер бұл мәліметке қайшы мәлімдеме жасады. Олар Қазақстандағы «Додо Пицца» клиенттерінің деректеріне де қол жеткізгенін айтып отыр. Олардың келтірген дерегіне сәйкес, қолдарында 59 миллионнан астам бірегей тапсырыс, 6,5 миллион телефон нөмірі және 6,7 миллион клиент туралы ақпарат бар.

Киберқылмыскерлер компанияның «тек клиенттердің бір бөлігінің деректері қолжетімді болды» деген мәлімдемесін де жоққа шығарған. Олардың айтуынша, қолдарында «Додо Пицца» жұмыс істейтін барлық елдегі барлық клиент пен тапсырыс туралы ақпарат бар.

Хакерлердің мәліметінше, «Додо Пиццада» тіркелген 53,1 миллион клиенттің кемінде бір рет тапсырыс бергені анықталған. Ал компанияның 15 жылдық жұмысы барысында барлық елдер бойынша шамамен 860–870 миллион тапсырыс жасалған. Оның 744 миллионы, яғни барлық тапсырыстың 86 пайызы Ресейге тиесілі деген мәлімдеме жасалды.

Сонымен бірге хакерлер ұрланған базаны ашық жарияламайтынын айтқан.