RUS
БҚО цифрлық технологиялар басқармасының басшысы Нұрсұлтан Нұрланның мәлім еткеніндей, қазіргі таңда 35 елді мекеннің төртеуінде жаңа базалық станция орнатылып, 31-інде 4G стандартын қосу арқылы сапасын жақсарту жұмыстары жүргізілді.
Оның сөзіне қарағанда, жыл соңына дейін тағы 49 ауылда мобильді байланыс сапасы жақсартылады.
ҚР Цифрлық даму, инновациялар және аэроғарыш өнеркәсібі министрлігі Телекоммуникациялар комитетінің өңіраралық байланыс инспекциясы 2023 жылы мамыр айындағы мәлімет бойынша нысандарға бару арқылы байланыс операторларына қатысты байланыс қызметтерінің сапа көрсеткіштеріне сәйкестігіне орай 24 жоспардан тыс тексеру жүргізді.
Егер де былтыр салынған айыппұл көлемі 46 млн теңгені құраса, биыл 20 ауыл және Орал, Ақсай қалаларындағы тексеріс нәтижесінде 59,5 млн теңгеге айыппұл салынды (оның ішінде: Билайн – 12,9 млн, Теле2/Алтел – 36,2 млн, Кселл/Актив – 10,3 млн).
«Тұрғындарды стационарлық интернетпен қамту үшін басқарма өңірдегі ірі байланыс операторларымен («Қазақтелеком», «Транстелеком» және Jusan Mobile) бірге сымды және сымсыз технологияларды пайдаланып, Орал қаласында және аудандарда дилерлік желі арқылы жұмыстар жүргізуде. Мысалы, «Қазақтелеком» компаниясының «Ауылдағы цифрлық серіктес» және басқа да жобаларымен 18 елді мекен қамтылуда. Облыс орталығындағы жеке секторды (саяжай тұрғындарымен қоса) интернетпен қамту мақсатында Батыс Қазақстан электр желілерін таратушы компаниясымен бірлесіп электр тіректерін қолдану арқылы операторлар жұмыс атқаруда», деді Н.Нұрлан.
Облыста барлығы 416 ауылдық елді мекен болса, соның 305-і интернетпен қамтылған. Қамтылмаған 78 елді мекенде 6,6 мың адам тұрады. Тұрғын саны 250-ден кем 36 ауыл интернетпен қамту жобасына енгізілді.
Басқарма тарапынан ҚР Цифрлық даму, инновациялар және аэроғарыш өнеркәсібі министрлігімен бірлесіп Орал қаласы және ауылдарда байланыс және интернет желісімен қамту туралы жол картасы әзірленіп, байланыс операторларымен келісілуде.