Семейде 6 студенттің шоттары дропперлік схемаға пайдаланылған

SMARTNEWS.KZ басылымының хабарлауынша, Семейде алты студенттің банк шоттары интернет-алаяқтықтан зардап шеккен азаматтардың ақшасын аудару және қолма-қол ақшаға айналдыру үшін пайдаланылған. Бұл туралы Абай облысы бойынша Қаржылық мониторинг агенттігінің департаменті мәлімдеді.

Ведомство мәліметінше, жергілікті университеттің алты студенті анықталып, жауап алынған. Олардың банк карталарына ақша түскеннен кейін қаражат басқа шоттарға аударылып, кейін қолма-қол ақшаға айналдырылған.

ҚМА дерегінше, бұл схемаға дропперлерді іздеумен және олардың банк шоттарын заңсыз қаржылық операциялар үшін пайдаланумен айналысқан адамдардың қатысы болған.

Тергеу барысында ақша қаражатының басқа банк шоттарына бірнеше бөлікке бөлініп аударылғаны анықталған. Тергеу нұсқасына сәйкес, мұндай тәсіл қаражаттың шығу тегін жасырып, қаржы операцияларын бақылауды қиындатқан.

Бір студенттің шотына 16 млн теңгеден астам ақша түскен

ҚМА мәліметінше, студенттердің бірінің банк шотына 25 адамнан жалпы сомасы 16 млн теңгеден астам қаражат түскен.

Ақша жіберген азаматтар интернет-алаяқтық істері бойынша жәбірленушілер болып шыққан. Олардың арыздары Абай, Қарағанды, Ақтөбе, Түркістан, Атырау, Батыс Қазақстан, Павлодар, Ақмола, Жамбыл және Алматы облыстарынан, сондай-ақ Алматы мен Шымкент қалаларынан түскен.

Қазір іс бойынша барлық мән-жай анықталып жатыр.