«Әкемнің беті қан-жоса болды»: Алматы тұрғыны пансионаттағы күтімге шағымданды
Әйел адам әкесінің пансионаттағы жарақат алуына байланысты тексеру талап етті.
SMARTNEWS.KZ басылымының хабарлауынша, Алматы тұрғыны Инна Лисина әкесін уақытша орналастырған «Доброта» пансионатының қызметкерлеріне қатысты шағым түсірді. Әйелдің айтуынша, мекемеде бірнеше күн болғаннан кейін әкесінің бет сүйектері сынып, басынан жарақат алғаны анықталған. Отбасы полицияға арызданған. Ал пансионат директоры ер адамның құлап қалғанын айтып, медициналық құжаттарда көрсетілген сынықтар бұрыннан бар жарақаттар екенін алға тартты. Бұл туралы NewTimes.kz агенттігі жазды.
Қызы не дейді?
Иннаның сөзінше, әкесі Владимир үнемі күтімді қажет етеді. Екі жылдан астам уақыттан бері ер адамнан деменция белгілері байқалғанымен, әзірге нақты диагноз қойылмаған. Соңғы бір жарым жылда оған қызы өзі қарап, осы себепті жұмыс істемеген.
Отбасылық жағдайға байланысты әйелге шұғыл түрде Астанаға бару қажет болғанда, ол әпкесімен бірге әкесін бір айға үйіне жақын орналасқан пансионатқа орналастыруды ұйғарған. Алдын ала мекемеге барып, жағдайымен танысқан. Иннаның айтуынша, қызметкерлер жақсы күтім жасалатынын және ғимаратта бейнебақылау камералары бар екенін жеткізген. Бір айлық қызмет үшін отбасы 200 мың теңге төлеген.
Алғашқы күндері пансионат қызметкері Владимирдің жағдайы жақсы екенін хабарлап отырған. Кейін ер адамның дене қызуы көтерілгені айтылып, қызы оған дәрі-дәрмек жеткізген. Келесі күні мекеме директоры Иннаның әпкесіне әкесінің жарақат алған күйдегі видеосын жіберген.
«Әкем жерде жатыр, соққыға жығылғандай күйде. Көзіне мұз басып қойыпты. Иегі, көзі, мұрны – бәрі қан-жоса. Әпкеме бірден хабарласып, тез жетуіміз керек екенін айттым», – дейді Инна Лисина.
Әйелдің айтуынша, әпкесі пансионатқа барған соң директорды шамамен 40 минут күткен. Кейін оларды әкесінің жанына кіргізгенде, оқиғаның қалай болғанын сұраған. Мекеме басшысы Владимирдің сүрініп құлағанын айтқан.
Инна директор бастапқыда бейнебақылау жазбасын көрсетемін деп уәде бергенін, алайда кездескен кезде камераларда ақау барын және интернет істемей тұрғанын алға тартқанын айтады.
Қызының сөзінше, ол полиция мен жедел жәрдем шақырған. Әкесі айналасында болып жатқан жағдайға дерлік реакция танытпаған. Пансионат қызметкерлері мұны ер адамға кешке дәрі берілгенімен және ұйықтап жатқанына байланысты түсіндірген.
Владимир қалалық №4 ауруханаға жеткізілген. Иннаның айтуынша, медициналық тексеру нәтижесінде бет сүйектерінің бірнеше жерден сынғаны, бас жарақаты, денесінде көптеген соққы іздері және қолында үлкен гематома бары анықталған.
Дәрігерлер ер адамды ауруханаға жатқызуды ұсынғанымен, қызы одан бас тартып, әкесін үйіне алып кеткен. Ол әкесінің өзіне-өзі қарай алмайтынын және тұрақты күтімге мұқтаж екенін түсіндірген. Оқиғадан кейін пансионат отбасы төлеген 200 мың теңгенің 170 мың теңгесін қайтарған.
Инна әкесін орналастырмас бұрын пансионаттың Instagram парақшасын қарағанын, ал 2GIS-тегі пікірлерді оқиғаның болғанынан кейін ғана зерттегенін айтады. Оның сөзінше, мекенжайда 2022 жылдан бері күтім сапасы мен қызметкерлердің постояльцтерге қарым-қатынасына қатысты шағымдар жарияланған.
Әйел полиция қызметкерлерінің әрекетіне де наразылық білдірді. Оның айтуынша, тәртіп сақшылары әкесін аудандық полиция басқармасына алып келуді сұраған. Алайда Инна ер адамның өздігінен жүріп-тұра алмайтынын түсіндірген. Кейін полицейлер үйіне келгенімен, Владимир олардың өтінішіне де жауап бере алмаған.
Қызының сөзінше, келесі әңгіме барысында полиция қызметкері бас сенімхат рәсімдеуді ұсынған. Әйел әкесінің қазіргі жағдайында мұның қалай жүзеге асатынын түсінбейтінін айтып, тәртіп сақшыларынан үйге қайта келуді сұраған. Алайда оның айтуынша, бұдан кейін полиция тарапынан басқа әрекет болмаған.
Пансионат басшылығы не дейді?
«Доброта» пансионатының директоры Светлана Владимир Лисиннің қызметкері түстен кейінгі асын алуға аз уақытқа кеткенде құлап қалғанын мәлімдеді. Оның айтуынша, ер адам мекемеге 31 қазанда жеткізілген. Бастапқыда туыстары пансионатты тек көруге келетінін айтқан.
Директордың сөзінше, Владимир өте қимылшыл болған, бір орында отырмай, үнемі жүріп жүрген. Пансионатта болған бес күннің ішінде қызметкер Рамиль оған үздіксіз қараған.
Мекеме басшысы ер адамның күтімі басқа қызметкерлердің жұмысын да қайта бөлуге мәжбүр еткенін айтты. Дүйсенбі күні ол туыстарымен хабарласып, диагнозы мен дәрігер тағайындаған ем туралы қосымша ақпарат сұраған. Директордың мәліметінше, рецепт алғаннан кейін Владимирге түнде 25 миллиграмм мөлшерінде кветиапин берілген.
Светлананың айтуынша, ер адамның құлағанын сәрсенбі күні білген. Ол туыстарына оқиға туралы хабарлап, қызметкер жіберген видеоны жолдағанын айтады. Директор бастапқыда оқиғаны өзі көргенін айтқанын да түсіндірді. Оның сөзінше, жазба қолжетімді болады деп ойлаған.
Пансионат басшысы бейнебақылау жүйесіндегі ақаулар 22 қазаннан бері болғанын мәлімдеді. Айтуынша, мекеме мамандарға жүгінгенімен, мәселе оқиғаға дейін шешілмеген. Кейбір камералар жазбаны тұрақсыз түсірген, ал ерлер бөлмесіндегі камера мүлде жұмыс істемеген.
Светлана Владимирдің бұрын бокс спортымен айналысқанын да айтып, медициналық құжаттарда көрсетілген сынықтар пансионатқа келгенге дейін пайда болған деген пікір білдірді. Оның сөзінше, мекеме сарапшылармен және травматологтармен кеңескен. Алайда жарияланған материалда олардың жазбаша қорытындылары көрсетілмеген.
Директор ер адамның бұрыннан алған жарақаттары бар екенін, ал қазіргі жағдайында тек жұмсақ тіндердің соғылуы байқалғанын алға тартты. Сондай-ақ пансионат басшысы отбасының полицияға арызданғанын, ал мекеме қызметкерлері түсініктеме беріп, бейнебақылау жүйесіндегі ақаулар туралы мәліметтерді көрсеткенін жеткізді.
Алматы қаласының полиция департаменті әзірге ресми мәлімдеме жарияланған жоқ.
Материал авторы