RUS
Ұйымдастырушылардың айтуынша, бүгінгі шара Қазақстан мен Испания арасындағы сауда-экономикалық ынтымақтастықты нығайтып, кеңейте түсуге септігін тигізеді.
«Бүгінгі отырысқа Қазақстаннан 150-ге жуық адам және Испаниядан 35-ке жуық компания қатысып отыр. Мұндай шаралар Қазақстан мен Испания кәсіпкерлерінің өзара терең қарым-қатынас орнатуы үшін қажет. Қазіргі уақытта екі ел арасындағы өзара сауда айналымы шамамен 2,5 млрд еуроны құрайды. Бұл көрсеткіш өткен жылмен салыстырғанда 42% жоғары. Испаниямен сауда және инвестициялық қарым-қатынасты үнемі арттырып келеміз. Бүгінгі кеңес аясында бірқатар келіссөздер жүргіземіз. Оның ішінде су тазарту құрылысы, ауыл шаруашылығы және су ресурстарын басқару, машина жасау саласындағы кооперацияны дамыту бойынша келісімге келмекпіз», - деді Бәйтерек холдингінің басқарма төрағасы Қанат Шарлапаев.
Оның айтуынша, испан компаниялары біздің негізгі технологиялық серіктесіміз.
«Еуропалық одақ экономикалық өзара іс-қимыл тұрғысынан Қазақстанның ең ірі серіктестерінің бірі. Ал Испания — осы ынтымақтастық шеңберіндегі ең маңызды серіктес ел. Испаниямен стратегиялық кооперация бойынша екінші келісімге қол қойылды. Осы елмен екіжақты бизнес қарым-қатынасты жалғастыруға негіз бар деп санаймыз. Испан компаниялары біздің негізгі технологиялық серіктестеріміз, ең алдымен құрал-жабдық жеткізу бойынша», - дейді ол.
Жиынның панельдік сессиясында ҚР-Испания іскерлік өкілдері қаржы құралдары мен өзара бизнес мүмкіндіктерін талқылады.
«Бүгінгі кездесу ҚР мен Испания арасындағы бірлескен жобаларды одан әрі дамытуға және экономикалық байланыстарды жақсартуға қызмет ететініне сенімдімін. Біз пандемияға дейінгі нәтижелерге қол жеткіздік. Үкімет экономикалық байланысты нығайтуға көмектесуде. Экологиялық аспектілер, көлік, гендерлік теңдікті одан әрі дамыту бойынша да қол ұшын созуда. Климаттың өзгеруімен күресіп, жағдайы төмен адамдарға қатысты тең құқықты дамытудамыз. Екіжақты ынтымақтастық арқылы жоғары салық түсімдеріне қол жеткіземіз. 2023 жылы өсім 5% құрады және бұл өте жоғары экономикалық көрсеткіш. Испандық компаниялар жемісті ынтымақтастықты жалғастыруға ниетті, оның дәлелі бүгінгі кездесу», - дейді Испания тарапынан ҚР-Испания үкіметаралық комиссиясының төрағасы Шиана Мендес.