RUS
"Ол кісі менің ұстазым. Ол кісіге көмектесу үшін шама-шарқым келгенше әрекет жасадым. "Аға, қойыңыз, тоқтаңыз", - деген жанашырлықты ол басқаша қабылдады. Біреудің айтуымен деген сияқты... Өзі солай ойласа, мен не істеймін? Жанашырлық танытсаң, оны біреу керісінше қабылдайды. Мен барынша, шамам келгенше ол кісіге ағам ретінде, ұстазым ретінде жақсылық жасауға тырыстым. Ал ол кісіге кім ақыл берді, кім кеңес берді әлде өзі солай түсінді ме? Білмеймін. Бұл туралы әлеуметтік желі, газет-журнал, теледидар, барлығына айтардай айтты. Бірақ мен оны тайталасып айтқым келмейді. Өйткені өзімнің пейілім, көңілім таза екенін білемін. Керек емес нәрсе ол", - деді актер.
Сондай-ақ Ерлан Біләл ұстазы Тұңғышбай Жаманқұловтың әйеліне министрден кешірім сұратпақ болған деген сұраққа да жауап берді.
"Мұны қазір қазып, шу қылып, айтқым келмейді. Бұдан ешкім береке таппайды. Қара нәрсемен, қараңғы нәрсемен алысудың орнына, адам жақсылыққа, жарыққа ұмтылуы қажет. Менің принципім сол. Мен қалай айтамын? Сол кісіде оқыдық. "Барайық, ана кісі кетіп бара жатыр. Анасың ғой сен. Мүмкін саған тоқтайтын шығар. Мына жағдай тоқталар, бір ыңғайға келер",- дегенім рас. Мен гений емеспін. Шамам жеткені сол. Айттым. "Ана кісі ертең түрмеге кетіп қалмасын", - дедім. Ал маған үй алып бердім дегені өтірік. Маған спонсор тауып, үй алып берген - Болат Атабаев", - деді Ерлан Біләл.
Актер ұстазымен қазір де көрісіп қалатынын жасырмады.
"Иә, кездесіп қаламын. Амандассам кейде ол кісі алмай кетеді. Шариғатта кім бірінші амандасса, ол Алла тағаланы есіне алған адам дейді. Парызым, борышым ба? Мен бірінші амандасамын. Амандаспаса өзі біледі. Сәлемімді алмай кетсе, өзі біледі. Алса, тағы өзі біледі. Әлі де солай, көргенде амандасам. Кейде асыра сілтеп қойса, амандаспаймын. Бәрібір сәлемімді алмайды. Жақын кеп қалса, амандасам. "Тіліңіз жеткенше бәрін айттыңыз ғой. Қоялық. Тату болайық, амандасайық, сәлемдесіп жүрейік", - дедім. Бұл өмір кімнен қалмаған өмір? "Тоқтап, түзу жүрелік", - дедім. Иә деп те, жоқ деп те айтпады", - деді актер.