RUS
«AMANAT» партиясы еліміздегі заңсыз иемделген активтерді қайтару мәселесіне ерекше назар аударады. Қазақ ұлттық аграрлық зерттеу университетінің бір топ оқытушы-ғалымы Мәжіліс депутаттарына университеттен заңсыз шыққан активтерді оқу орнына қайтару туралы өтініш жасады.
Университет ұжымы басқа меншік иелеріне заңсыз өткен активтер тізімімен таныстырды: 2001-2022 жылдары 3 студенттік жатақхана (1000 төсек-орындық), 5 оқу-зертханалық корпус (18828,5 шаршы метр) әкімшілік-шаруашылық ғимараттар және өзге де жылжымайтын мүлік объектілері (700 шаршы метр), университет ғимараттарына іргелес жер учаскелері (шамамен 5 гектар), Алматы облысының Талғар және Еңбекшіқазақ аудандарында орналасқан университеттің оқу-тәжірибелік шаруашылығындағы жер учаскелері (12 гектар) қолды болып кеткен. Қазақтың жалпақ тілімен айтсақ, университет мүлкінің «ту-талақайын» шығарған», - деді депутат Мәжілістің жалпы отырысында.
Оның атап өтуінше, аталған нысандарды иеленген заңды тұлғалар оқу корпустарының аумағында тұрғын үй кешендерін салған. Жатақханаларды қонақ үй етіп қайта жабдықтаған. караоке, басқа да ойын сауық орындарын ашқан. Кейбір оқу корпустарын бизнес-орталықтарға айналдырған.
«Осы фактілер қаншама жастар мен оқытушыларды басына отырып, жеткіншек ұрпақтың моральдық-рухани әлеміне ойсырата жасалған соққы, әділеттілік принциптерін таптау болып саналады. Университет ұжымы активтерді сату немесе оларды сенімгерлік басқаруға беру туралы барлық шешімдер ректор Т.И.Есполовтың тұсында қабылданғанын жеткізіп отыр. Бас прокуратура елімізде заңдылықты бақылап отыратын орган ретінде мынадай қадамдар жасауға: заңсыз қолды болған активтерді қайтару комиссиясы аясында аталған ғимараттардың мемлекет меншігіне қайтарылуын жедел қамтамасыз етуге; 2001-2022 жылдары осындай заңды белшесінен басып, барып тұрған бассыздыққа барған шенеуіктердің заң алдында жауапкершілігін анықтауға; еліміздегі басқа да жоғарғы оқу орындарының меншікті заңсыз беру мәселесіне аудит жүргізуге тиіс деп санаймыз», - деді Ерлан Саиров.