RUS
Атырау облысы прокурорының орынбасары Нұржан Серікұлының айтуынша, азаптау туралы істерді тергеп-тексеру прокуратура органдарына жүктелген.
«Мемлекет басшысы азаптауға жол беруге болмайтынына, әрбір бұзушылық фактісі бойынша тиісті шаралар қабылдануы қажеттігіне көңіл аударып отыр. Осыған орай азаптауды түбегейлі жою және оны болдырмау мақсатында Қылмыстық-атқару жүйесіндегі пенитенциярлық мекемелер жаппай бейнебақылау камераларымен жабдықталды. Прокурорлар камералар арқылы үнемі онлайн (қашықтан) мониторинг жүргізіп, қамауда отырғандардың құқықтарының сақталуына қадағалау жүргізуде», -деп хабарлады Нұржан Серікұлы.
Оның айтуына қарағанда, түзеу мекемелерінің қолжетімді жерлеріне 16 электронды терминал орнатылған. Бұл сотталғандардың прокуратураға және басқа да мемлекеттік органдарға өтініш беру рәсімін жеңілдеткен.
«Сотталғандарға өтініш жолдаудың тәртібі түсіндірілді. Терминал қамаудағыларды ЖСН және биометриялық мәліметтері арқылы таниды. Саусақ іздерін сканерлегеннен кейін терминал өтінішті қабылдап, арнайы талон береді. Бастысы, бұл процестердің барлығы мекеме әкімшілігінің қатысуынсыз жүзеге асырылады. Олардың заңсыз әрекеттеріне кедергісіз шағымдануға мүмкіндік береді. Бұл заң бұзушылықтардың алдын алуға, уақытылы анықтауға жол ашады», -деп мәлім етті Нұржан Серікұлы.