RUS
Атаулы әлеуметтік көмек (АӘК) еліміздегі күнкөріс табысы төмен адамдарға арналған көмек. Биыл осы мақсатта бюджеттен 73,9 млрд теңге бөлінген болатын.
Еңбек және халықты әлеуметтік қорғау министрлігінің хабарлауынша, АӘК отбасының әрбір мүшесіне, жан басына шаққандағы орташа табысы өңірлік ең төменгі күнкөріс деңгейінің 70%-ынан төмен азаматтарға тағайындалады. Сондай-ақ, осы жылдың 1 қаңтарынан бері 1-6 жастағы балаларға берілетін кепілдендірілген әлеуметтік топтама көмектің табиғи нысанынан, монетизациялау форматына, яғни 1,5 АЕК мөлшерінде (2023 жыл – 5175 теңге) қосымша төлем түріне ауыстырылды. Ал 1 маусымдағы есеп бойынша АӘК алушылар қатарындағы 1 жастан 6 жасқа дейінгі балаларды қоса алғанда – 157,2 мың балаларға қосымша төлем тағайындалды.
АӘК алуға қалай өтініш бере аласыз? Қазіргі уақытта өтінішті тұрғылықты жері бойынша жұмыспен қамту орталығында, ауыл округінің әкіміне, сондай-ақ egov.kz электрондық үкімет порталы арқылы беруге болады.