RUS
11-17 маусым аралығында Өзбекстан Республикасының Хиуа қаласында өткен Әбу Райхан әл-Бируни атындағы химия пәнінен халықаралық олимпиадаға әлемнің үш континентінің 16 елінен 130 жас ғалым қатысқан. Қазақстан ұлттық командасының құрамына бұған дейін химия пәнінен халықаралық Менделеев олимпиадасының төрт жүлдегері енген. Олардың төртеуі де әл-Бируни атындағы олимпиада жүлдегері атанды. Олар:
2-орын. Әділжан Молдағұлов— Маңғыстау облысының «Білім-инновация» лицей-интернатының 10 сынып оқушысы;
2-орын. Диас Қоршыбек — Жамбыл облысының дарынды ер балаларға арналған «Білім-Инновация» лицей-интернатының 10 сынып оқушысы;
2-орын. Әлихан Смет — Астана қаласының дарынды ер балаларға арналған «Білім-инновация» лицей-интернатының 11 сынып оқушысы;
3-орын. Инсар Имаш — Алматы қаласындағы Haileybury Almaty мектебінің 11 сынып оқушысы.
ҚР Оқу-ағарту министрлігінің ақпаратына сәйкес, Әбу Райхан әль-Бируни атындағы халықаралық олимпиада Өзбекстанда алғаш рет ұйымдастырылып отыр. Олимпиада екі кезең бойынша өтіп, қатысушылардың білімі мен әлеуеті жазбаша және практикалық зертханалық жұмыстар арқылы бағаланған.