RUS
Кеше азаматтық істер жөніндегі апелляциялық сот алқасы жауапкердің Қарасай аудандық сотының 17 сәуірдегі шешіміне берген апелляциялық шағымы бойынша азаматтық ісін қарады.
«Қарасай ауданының прокуратурасы мемлекеттік мекемелер мен Н. есімді азаматқа қатысты талап-арызбен сотқа жүгінді. Бұл ретте жер телімдерін сатып алу-сату шарттарын жарамсыз деп тану, жер учаскелеріне меншік құқығы туралы мемлекеттік актілерді жарамсыз деп тану және жер учаскелеріне меншік құқығын мемлекеттік тіркеудің күшін жою талабы қойылған еді. Сот барысында аталған адамға ауыл шаруашылығы мақсатындағы жерлерге қатысты учаскелері берілген кезде, облыстық аумақтық орган мен жер ресурстарын басқару жөніндегі орталық уәкілетті органның келісімі болмағаны анықталды», - делінген облыстық сот мәліметінде.
Суармалы егістік жерлерді суарылмайтын жер түріне ауыстыру туралы түпкілікті шешім қабылдау облыстық атқарушы органның құзыретіне жатады.
Сондықтан аудан әкімінің 2014 жылы жер учаскелеріне қатысты уақытша пайдалану (жалға алу) құқығын беру туралы қаулысы аудан әкіміне белгіленген құзыретті бұза отырып шығарылған.
«Қарасай аудандық сотының 17 сәуірдегі үкімімен прокурордың аталған шарттарды жарамсыз деп тану және жер учаскелері бойынша меншік құқығын мемлекеттік тіркеудің күшін жою туралы талап-арызы ішінара қанағаттандырылды. Бұл тұрғыда сот шешімімен келіспеген жауапкер апелляциялық шағым түсірді. Азаматтық істер жөніндегі апелляциялық алқа бірінші сатыдағы соттың шешімін заңды деп танып, қаулыны өзгеріссіз қалдырды», - деп аталып өткен Алматы облыстық сотының мәліметінде.