RUS
Астанадағы Қалибек Қуанышбаев атындағы театр ұжымы сахналаған туындыда Шыңғыс ханнан бастап, Жошы дәуіріндегі Қазақ мемлекеттігінің құрылу кезеңі суреттелген. Қойылым негізінен «Шыңғыс ордасы» мен «Қазақ ордасы» атты екі бөлімнен тұрады.
Тарихи драманың авторы – белгілі жазушы-драматург Думан Рамазан, қоюшы режиссері – Қазақстанның еңбек сіңірген қайраткері Болат Ұзақов.
Мемлекет басшысы қойылымды тамашалаған соң, театр ұжымымен әңгімелесіп өз әсерімен бөліскен:
– Құтты болсын! Өте керемет қойылым болды. Шын мәнінде, пьесаның тақырыбы өте маңызды, өзекті. Мұндай туындылар халқымыз үшін қажет деп ойлаймын. Пьесаның тілі, мәтіні өте жақсы жазылған. Әртістердің бәрі жақсы ойнады. Шеберлігі мықты екен. Біздің тарихымызды, тарихи құндылықтарымызды қазіргі таңда халық арасында кеңірек дәріптеуіміз керек. Кейбіреулер қазақтардың өз тарихы, мемлекеті, елі болмаған деген сөздер айтып жүр. Ол – біздің тарихымызды бұрмалау. Өнерлеріңіз қашанда табысты болсын. Баршаңызға аманшылық тілеймін, – дейді Мемлекет басшысы.
Сондай-ақ Президент театрға ұлттық мәртебесін беру туралы шешім қабылдағанын жеткізді.