RUS
2008 жылдан 2016 жылға дейін Американы басқарған Барак Обама бейсенбі күні CNN-ге берген сұхбатында даулы мәлімдеме жасады. Арнаның халықаралық шолушысы Кристиан Аманпур Мәскеудің халықаралық заңнаманы өрескел бұзуына ұжымдық Батыстың (ең алдымен АҚШ пен Еуропалық Одақтың) реакциясын ретроактивті түрде бағалауға қатысты сұрақ қойған болатын. Обаманың айтуынша, 2014 жылы Украина мемлекетінің саясаты қазіргіден мүлде басқаша болған. Қырымда да, Украинаның өзге бөлігінде де Кремльге адал және орыс насихатына бейім орыс тілді адамдар көп болған. Сондықтан Қырымды Ресейдің күштеп тартып алынуына реакция әлсіз болған.
- Ангела Меркель (Германияның бұрынғы канцлері - ред.) екеуміз еуропалық серіктестерді біз енгізген санкцияларды енгізуге көндіру үшін көп күш жұмсадық. Әрі Путиннің Донбассты басып алуына жол бермедік, - дейді Обама.
Сондай-ақ Барак Обама сол кездегі әлсіз күшке қарамастан, тойтарыс бере алдық деп ағынан жарылды.
- Ол кезде Украинаның, Еуропаның да қандай көңіл-күйде болғанын ескерсем, біз соққыны толығымен ұстап тұра алдық деп ойлаймын, - деп қорытындылады бұрынғы президент.
Еске сала кетсек, Владимир Путин 500 американдыққа, оның ішінде Барак Обамаға да Ресейге кіруге тыйым салған болатын. Ресей Сыртқы істер министрлігі Америка тарапынан түскен санкцияларға жауапты осылай қайтарған. Кіруге тыйым салынған адамдар тізімінде Обамадан бөлек, қазіргі және бұрынғы шенеуніктер, конгрессмендер мен сенаторлар, талдау орталықтарының қызметкерлері және әскери-өнеркәсіптік компаниялардың басшылары кірген.