RUS
Алматы қаласындағы Абай атындағы Республикалық мамандандырылған дарынды балаларға арналған қазақ тілі мен әдебиетін тереңдете оқытатын орта мектеп-интернатында 26-28 маусым аралығында өтетін білім додасы Абай шығармашылығын оқу арқылы көркемсөздің танымдық, тағылымдық, эстетикалық мән-маңызын түсінетін жас ұрпақ тәрбиелеуді, оқушылардың зияткерлік және шығармашылық қабілеттерін дамытуды мақсат тұтады. Олимпиадаға облыстық кезеңнің жеңімпаздары атанған жалпы білім беретін ұйымдардың 9-11-сынып оқушылары қатысады. Биыл бесінші рет өткізгелі отырған білім олимпиадасында еліміздің әр өңірінен, оның ішінде 13 облыс, 3 республикалық маңызы бар қала, 3 республикалық білім беру ұйымдарынан 95 оқушы бақ сынайды.
Олимпиада екі айналымнан тұрады. Бір оқушы екі айналымға да қатысады. Бірінші айналымда қатысушы Абай қарасөздері мен поэзиясы негізінде дайындалған тақырыптардың біріне эссе жазады. Екінші айналымда М.Әуезовтің «Абай жолы» романы, Абай шығармашылығы бойынша дайындалған тапсырмаларға жауап береді. Абай іліміне көзқарасын білдіріп, Абайтанушы ғалымдар жайлы жалпы білімін көрсетеді. Сонымен қатар қатысушының М.Әуезовтің «Абай жолы» романынан алынған сөйлемдерге кешенді талдау жасау арқылы грамматикалық сауаттылығы анықталады.
Білім сайысында жеңіске жеткен оқушыларға Оқу-ағарту министрлігінің I, II, III дәрежелі дипломдары, «Ұшқан ұя» түлектер бірлестігінің демеушілігімен бағалы сыйлықтар табысталады.