RUS
Оқиға өткен жұма, 23 маусымда Қарағанды облысы Нұра ауданы Қайнар ауылдық округінде болған. Жергілікті тұрғынның бірі Құлан өзенінен ақбөкендердің өлексесін көрген. Сол күні кешке Қарағанды облыстық орман шаруашылығы және жануарлар дүниесі аумақтық инспекциясының мамандары келді. Белгілі болғандай, өзенде 86 ақбөкеннің биылғы төлі суға батып кеткен.
«23 маусымда Құлан өзенінде суда 86 бас ақбөкен төлдерінің өлексесі табылды. Комиссия құрамында: Қарағанды облыстық орман шаруашылығы және жануарлар дүниесі аумақтық инспекциясының, Нұра ауданының табиғатты қорғау полициясының, «Охотзоопром» РМҚК, кенттің ветеринариялық инспекциясы және Қайнар ауылдық округі әкімдігінің қызметкерлері тексеру жүргізді. Өлген жануарлардың өлексесінде ыдырау іздері бар, бұл олардың жынысын, оқ тиген-тимегенін анықтауға мүмкіндік бермеді (қылмыстық іздер жоқ)», - деп мәлімдеді ЭТРМ орман шаруашылығы және жануарлар дүниесі комитетінің Қарағанды облыстық орман шаруашылығы және жануарлар дүниесі аумақтық инспекциясының басшысы Абзал Балтабаев.
Мамандар ақбөкендердің өлексесін арнайы полигонға шығарып, жойып жіберді. Болжам бойынша, олардың жаппай қырылуына жас ақбөкендердің өзендегі өткелден өте алмауы себеп болған. Инспекция хабарлағандай, бұл учаскеде су астында терең жар бар.
«Суға батып кеткен төлдер тым жас болғандықтан өткелден жүзіп өте алмаған болуы мүмкін», - дейді мамандар.
