RUS
Ауыр атлетикадан Қазақстанның төрт дүркін чемпионы, 2008 жылы Пекинде өткен Олимпиада ойындарына қатысушы Владимир Седовтың мәйіті өз үйінен табылды. Бұл ақпаратты Жетісу облыстық полиция департаментінің баспасөз қызметі таратты.
Полиция дерегінше, "мәйіттен зорлық-зомбылық белгілері байқалмаған". Ал туыстары спортшының өз-өзіне қол жұмсағанын айтқан.
2008 жылы Пекиндегі олимпиадаға қатысқан Қазақстан ауыр атлеттерінен допинг табылғанын 2016 жылы халықаралық ауыр атлетика федерациясы (IWF) хабарлаған болатын. Допинг қабылдады деген спортшылардың ішінде Владимир Седов та болған.
2018 жылы Владимир Седов сегіз жылға ауыр атлетикадан шеттетілді. Сондай-ақ спортшының 2008 жылдан 2016 жылға дейінгі кезеңде иеленген спорттық титулдарының күшін 2019 жылы халықаралық ауыр атлетика федерациясы ресми түрде жойған болатын.