Кәсіпкерлер халыққа арналған көмірді шетелге сатып жатыр – министр

«Елімізде 110 млн тонна көмір өндіріледі. Ал халықтың тұтынуына 9,3 млн тонна көмір қажет. Яғни жыл сайын 10 млн тоннаның көлемінде көмір керек. Халыққа жеткізілетін көмірдің бағасы төмен. Экспорттағы бағасымен салыстырғанда 5-6 есе төмен. Халыққа барып жатқан көмірді кейбір кәсіпкерлер алып, оны шетелге сатып жатыр. Өзбекстанға, Қырғызстанға сатуда. Соны болдырмас үшін елімізден автомобильмен көмірді шетелге шығаруға тыйым салдық», - деді Марат Қарабаев Үкімет отырысынан кейін тілшілердің сұрағына жауап бере тұрып.

Министрдің айтуынша, кәсіпкерлер көмірді сырт елге шығарудың басқа жолын тапқан.

«Енді олар көмірді көлікпен пойызға жеткізіп, шетелге пойызбен шығарып жатыр. Мәселе осында. Көмірді ертерек жаз уақытында алу керек», - дейді ол.