Елімізде 14 286 шет ел азаматы жұмыс істейді
2023 жылғы 1 маусымдағы жағдай бойынша жергілікті атқарушы органдардың рұқсатымен Қазақстан аумағында 14 286 шетел азаматы еңбек етеді, деп хабарлайды ҚР Еңбек және халықты әлеуметтік қорғау министрлігі.
Еңбек министрлігінің 1 маусымдағы есебіне сәйкес, Қазақстанға жұмыс істеуге келетін адамдардың көпшілігі мына салаларда жұмыс істейді:
- құрылыс – 5386 адам (35%),
- ауыл, орман және балық шаруашылығы – 1835 адам (10%),
- тау-кен – 1401 адам (10%) және өңдеуші өнеркәсіп – 1007 адам (7%),
- кәсіби, ғылыми және техникалық қызмет – 978 адам (7%).
Мигранттар негізінен Қытайдан көбірек келеді (3412 адам). Одан бөлек Өзбекстан (1884 адам), Үндістан (1484 адам) және Түркия (1397 адам) елдерінен де жұмыс істеуге келетін адамдар үлесі көп.