RUS
Мәдениет және спорт министрлігі Туризм индустриясы комитетінің хабарлауынша, жыл басталғаны 3670 онлайн-казино сайттарын бұғаттаудан бөлек, сот шешімінің негізінде 5 букмекерлік кеңсе мен 2 тотализатордың лицензиясы тоқтатылған. Бұған лицензиялық алымды төлеу бойынша қарыздар, ойын аймақтарынан тыс тіркеу, міндетті резервтің болуы бойынша талаптарды орындамау және басқа да бұзушылықтар негіз болған.
2022 жылы Туризм индустриясы комитеті 4 ойын автоматтары залына қатысты жоспардан тыс тексерулер жүргізген болатын. Тексеру нәтижелері бойынша, 1 зал жабылып, лицензиядан айырылса, 3 залдың қызметі тоқтатылып, 6 әкімшілік айыппұл салынған.
Мәдениет және спорт вице-министрі Ержан Еркінбаев аталған іске қатысты мынадай мәлімдеме жасады:
«Жасыратыны жоқ, онлайн-казинолар, атап айтқанда, олардың жарнамалары оңай жеңіске жетуге уәде беріп, құмар ойыншылардан ақша табуға тырысады. Бұған қарсы тұру үшін біз интернетте мониторинг жүргіземіз, сондай-ақ олардың қолданыстағы лицензияларын тексереміз. Мысалы, 4 букмекерлік кеңсенің, 3 тотализатордың және 1 ойын автоматтары залының лицензияларын жою жұмыстары жүргізіліп жатыр», - дейді вице-министр.
Еске сала кетсек, 2019 жылы елде интернет-ресурстарды мониторинг жүргізу үшін «Кибернадзор» ақпараттық жүйесі іске қосылған. Жүйе бірнеше мемлекеттік органдарға, соның ішінде Мәдениет және спорт министрлігіне интернет-казиноларды жедел анықтауға, сонымен қатар анықталған сайттарға тыйым салу мүмкіндігін берді.