Биыл Астана күнінде от шашу болмайды
Елорда күніне арналған мерекелік от шашу биыл тағы да ұйымдастырылмайтын болды. Бұл жөнінде smartnews.kz сайты хабарлайды.
Астана қаласы әкімдігінің баспасөз қызметі биыл 6 шілдеде аспанда от шашу атқыламаса да, қаланың 25 жылдық мерейтойына арналған 100-ден астам мерекелік іс-шара ұйымдастырылатынын мәлімдеді. Іс-шараның тоқсанға жуығы Астана тұрғындары мен қала қонақтары үшін тегін көрсетіледі. Сондай-ақ атаулы күнде ведомствоның ақпаратына сәйкес, бірнеше отбасыға пәтер кілттері табысталмақ.
"Мереке күндері бірқатар әлеуметтік нысандар, соның ішінде оқушылар сарайы, дене шынықтыру-сауықтыру кешені, аулалар, қоғамдық кеңістіктер ашылып, пәтер кілттері табысталады", - деп хабарлады әкімдік.
Еске сала кетсек, 2020 жылы Covid-19 вирусы өршіген уақытта, Астана күнінде от шашу атылғаны үшін, қоғамда дау туындаған болатын. Аталған дау-дамайдан кейін әкімдік 2021 мен 2022 жылдың 6 шілдесінде мерекелік от шашу болмайтынын хабарлаған. Осылайша Астана күні биыл да от шашусыз өтпек.