RUS
Түркістандағы №11 колледжде «Тамақтандыруды ұйымдастыру» мамандығы бойынша дәріс беретін педагог Жадыра Байдалы қымыздан балмұздақ пен сабын жасап шығарған.
Өнертапқыш педагогтың жаңа жобасының мақсаты - ұлттық балмұздақтың биологиялық құндылықтарға бай және адам ағзасына пайдалы екенін дәлелдеу. Қымыз балмұздағының басқалардан айырмашылығы отта дайындалады, тіпті соған қарамастан оның құрамы өзгермей, керісінше табиғи құндылығын сақтап қалады.
Педагог Жадыра Байдалы жасап шыққан өнімдеріне қатысты мынадай пікір білдірді:
«Біздің нарықта ұлттық өнімдер, оның ішінде қымыз өнімдерінің түрлері аз екенін байқауға болады. Балмұздақ жастарға да, балаларға да ұнайды. Қоспасыз биоөнімдер денсаулыққа да пайдалы», - дейді педагог.
Сондай-ақ Жадыра Байдалының айтуынша, сусынның құрамында түйіршікті ақуыздар бар, ол адам денсаулығына пайдалы табиғи иммундық қасиеттерге ие.
Балмұздақтан бөлек, емдік пайдасы бар саумал қосылған сабын шығара бастаған. Жобаны мемлекет қолдайтын болса, Жадыра эко-өнімдерді болашақта Қазақстанның өзге өңірлері мен шетелге экспорттауды жоспарлап отыр.