RUS
Каспий құбыр консорциумының баспасөз қызметінен мәлім еткендей, Маңғыстау мен Атырау облысының электр желісіндегі ақаудан кейін КҚК-ның мұнай айдау станциялары апатты түрде ажыратылған. Қазір КҚК-ның энергиямен жабдықтау жүйесіндегі кернеу тұрақтанған.
«Теңіз және Атырау мұнай айдау станциялары қайта іске қосылды. Консорциум Атырау облысындағы Теңіз кен орнынан мұнай қабылдауды қайта бастады. Мұнай құбырына шикізат негізінен Батыс Қазақстандағы кен орындарынан қабылданады. Құбырдағы мұнай Қара теңіздегі Новороссийск портына таяу орналасқан Оңтүстік Озереевка ауылындағы терминалына дейін жеткізіледі. Кейін әлемдік нарыққа жөнелту үшін танкерлерге тиеледі», - деп хабарлады консорциумның баспасөз қызметінен.
Өткен жылы Теңіз–Новороссийск құбыр желісімен 58,7 млн тонна мұнай тасымалданған. Оның ішінде 52,2 млн тоннасы Қазақстан аумағымен өткен.
«Каспий құбыр консорциумының құбыр желісіне Теңіз кен орнынан – 29 млн, Қашағаннан – 12 млн, Қарашығанақ кен орнынан 10 млн тонна мұнай қабылданды. Консорциумның теңіз терминалында 527 мұнай құю кемесіне мұнайды ауыстырып тиеуді қамтамасыз етті», -деп мәлім етті компаниядан.