RUS
БҚО ТЖ департаментінің баспасөз қызметінен мәлім еткеніндей, оқиға 5 шілде күні кешкісін Бәйтерек ауданы Асан ауылында болды.
«Сағат 19.54-те «Ранчо» кафесі тұсында Шаған өзенінен 21 жастағы жігіттің денесі шығарылды. Оның досының сөзіне қарағанда, жігіт сағат 18.35-те шомылуға жабдықталмаған жерден түсіп, суға батып кеткен. Оқиғаның себеп-салдары анықталып жатыр. Сот-медициналық сараптама тағайындалды. БҚО ТЖ департаменті алдағы демалыс күндерінің қатты ыстық болатындығын ескере отырып, тұрғындарға судағы қауіпсіздік ережелерін қатаң сақтап, жабдықталмаған жерден түспеу, сондай-ақ балаларды қараусыз қалдырмау керектігін еске салады», - деп хабарлады.
Департамент мәліметіне қарағанда, кеше сағат 18.40-та сондай-ақ Орал қаласы Желаев кенті ауданында «Карьер» жасанды су қоймасында 16 жастағы екі жасөспірім суға кетіп қала жаздады. Жабдықталмаған жерден суға түскен оларды құтқарушылар аман алып қалды.
Осымен биыл өңірде 2 адам суға кетсе, оның біреуі – жасөспірім. 6 адам құтқарылса, соның бесеуі – балалар.