RUS
Twitter компаниясы Facebook пен Instagram-ға иелік ететін Meta компаниясын сотпен қорқытты. Бұған себеп – кеше ғана іске қосылған Twitter-ге өте ұқсас жаңа Threads платформасы.
Бейсенбі күні кешке Semafor басылымы хабарлағандай, Twitter заңгері Алекс Спиро сәрсенбіде Meta басшысы Марк Цукербергке ресми хат жіберіп, Meta-ны Threads желісін құру кезінде "Коммерциялық құпияларды және басқа да зияткерлік меншікті жүйелі, зиянды және заңсыз иемденді" деп айыптаған.
Жаңа бағдарламаның пайда болуына Twitter-дің иесі Илон Маск тіптен мәз емес. Пайда бола сала 30 миллионға жуық жазылушы тіркелген желіге қатысты Маск:
«Бәсекелестік дегеніміз жақсы, ал өтірік жақсы емес", — дейді Twitter-дің иесі.
Threads желісін іске қосқан Meta басшылығы бастапқыда бұл желі Twitter-ге балама болады деп мәлімдеген еді. Сондай-ақ BBC News-тің технология бағытындағы тілшісі Джеймс Клейтон да, Threads қосымшасы Twitter-ге сыртқы және функционалдығы жағынан өте ұқсас екенін айтқан.
Одан бөлек, Twitter заңгері Алекс Спиро өзінің хатында Meta-ны компанияның құпияларына қол жеткізіп, осы әлеуметтік желіні тура көшіру үшін бұрынғы Twitter қызметкерлерін жалдады деп айыптайды. Заңгердің сөзінше, Meta осы құпияларды пайдалануды тоқтатпаса сотқа бермекші.
Ал Threads қосымшасының баспасөз хатшысы Энди Стоун техникалық командада Twitter-дің бұрынғы қызметкерлері жоқ деп жауап берді.