RUS
Алматыда асфальтбетон жабындысын төсеу үшін Абай даңғылы бойынша Тілендиев көшесінен Розыбакиев көшесіне дейінгі 7-9 шілде аралығында көлік қозғалысы толықтай шектелмек. Бұл уақытта көліктер Есенжанов, Сәтбаев, Тілендиев, Брусиловский, Тұрғұт Озал көшелерімен айналып өтеді.
«Қозғалысты шектеу осы учаскеде полимерасфальтбетонды қолданумен байланысты. Ол 150-160 С температурада төселеді, қажетті беріктікке жету үшін қоспаны 40 градусқа дейін салқындату керек. Әйтпесе, қоспаның құрамы көлік құралдары жүктемелерінің әсерінен бұзылады, бұл болашақта жарықтар мен колысулардың пайда болуына әкеледі. Жабынды төсеу жұмыстары түнде жүргізіледі, алайда жүргізілетін жұмыстардың сапасының нашарлауын болдырмау үшін бетті салқындату және тиісті қаттылық пен беріктікті жинау үшін орта есеппен 36 сағатқа шыдау ұсынылады. Бұл кезең, әдетте, күндізгі уақытқа сәйкес келеді, бұл қозғалыстың қабаттасуын түсіндіреді», - делінген Алматы әкімдігінің мәлімдемесінде.
Аталған технологияның пилоттық жобасы тағы да 15 көше үшін қолданылады. Олар: Әл-Фараби, Тілендиев, Байзақов, Абай, Тұрғұт Озал, Сайын, Төле би, Шаляпин, Манас, Қалдаяқов, Құрманғазы, Жұмалиев, Шагабутдинов, Досмұхамедов, Түркебаев. Пилоттық жөндеу біткен соң анализ жасалады. Сараптама нәтижесі оң болған жағдайда өзге де көшелер жөндеуден өтеді.
Осылайша бас-аяғы 230 көше жөндеуден өтпек. Олардың кейбірінің асфальт төсемі жаңартылса, кейбіріндегі коммунальдық желі реконструкциядан өтеді.
Сондай-ақ аталған жоба аясында Алматы әкімдігі жолдардың жаңаруына байланысты тұрғындардан сабыр сақтауды өтініп отыр.
«Уақытша қолайсыздықтар үшін кешірім сұраймыз. Бұл қала жолдарын жөндеу олардың бізге ұзақ қызмет етуі үшін қажетті шара. Сондықтан баратын бағыттарыңызды алдын ала белгілеп алуды өтінеміз», - дейді әкімдік өкілдері.