RUS
Маусым айындағы парламенттік отырыста депутат Абзал Құспанов өзінің депутаттық сауалында халыққа несие беру мәселесін көтерді.
"Ұлттық банк жылына 56% пайыздан аспауы керек деген шектеу халықшыл шешім емес. Бұл – халықты тығырыққа тірейтін шешім.Соның салдарынан ипотекалық және автокредиттер 25% пайызға дейін, ал қарапайым адамдар алып жатқан кепілсіз кредит 56% пайызға дейін көтеріп, халықтың белшесінен қарызға батырып отыр", - деген болатын.
Ұлттық банк басшысы Ғалымжан Пірматов қазақстандықтардың несиелік қарызы жайлы депутат сауалына мынадай жауап берді:
"Ұлттық банк борыштық жүктеме коэффициентінің ең жоғары деңгейін 0,5 деңгейінде белгіледі. Борыштық жүктеме коэффициентін есептеу және қолдану тәртібін Қаржы нарығын реттеу және дамыту агенттігі белгілейді. Ұлттық банк талдамалық мақсатта жинақталған деректер негізінде банктер берген қарыздар мен орташа айлық номиналды жалақының шамасы бойынша борыштық жүктемені бағалауды жүргізеді. 2023 жылғы 1 мамырдағы есеп айырысу нәтижелері бойынша борыштық жүктеме коэффициентінің мәні нормативтен төмен деңгейде бағаланды", - дейді Пірматов.
2023 жылғы 1 сәуірдегі мәліметтерге сәйкес, 7,9 млн қазақстандықтың несиесі бар. Қарыздардың жалпы сомасы 15,5 трлн теңгені құрайды.