RUS
Егер 2021 жылдың басында елімізде 38 букмекерлік кеңсе болса, бүгінде олардың саны - 16, ал іс жүзінде жұмыс істейтіндерінің саны – 12.
Мәдениет және спорт министрлігі түсіндіру жұмыстары арқылы және сот тәртібімен букмекерлік кеңселердің санын азайту бойынша жұмыс жүргізіп жатқанын мәлімдеді. Мәселен, соңғы 3 жылда букмекерлік кеңселер 15 лицензияны өз еркімен ведомствоға тапсырған.
Ал осы жылдың басынан сот шешімімен 5 букмекерлік кеңсе жабылып, олардың жұмысы қолданыстағы заңнама нормаларына сәйкес келмеген. Қазіргі уақытта тағы 3 букмекерлік кеңсеге қатысты лицензиялардың күшін жою жұмысы жүріп жатыр.
ҚР Мәдениет және спорт вице-министрі Ержан Еркінбаев бұл іске қатысты пікір білдірді:
«Мәдениет және спорт министрлігі букмекерлік кеңселер мен ойын бизнесінің басқа да нысандарының заң нормаларын сақтауын мұқият қадағалайды. Мәселен, 2023 жылдың басынан министрлік сот тәртібімен ойын бизнесі саласындағы 7 лицензияның қолданылуын тоқтатты. Осыған ұқсас тағы 7 ұйымға қатысты жұмыс атқарылып жатыр. Сондай-ақ интернетте де мониторинг жүргізіледі. Биыл 3670 заңсыз онлайн-казино бұғатталды»,- дейді вице-министр.
Сондай-ақ ведомство берген ақпаратқа сәйкес, Қазақстандағы ойын бизнесі субъектілерінің жалпы саны да кеміп жатыр. Соңғы 5 жылда олар 2,5 есе азайды. Егер 2018 жылы 97 болса, биыл олардың саны 38 бірлікті құрайды делінген.