RUS
Бүгінде жасанды интеллектің арқасында қолжетімді болған озық инновацияның бірі де бірегейі – FireAI. Жобаны жасаушылардың айтуынша, FireAI-дың негізгі мақсаты – дрондар мен жасанды интеллектінің (AI) көмегі арқылы төтенше жағдайлар кезінде түтін мен өртті дер кезінде анықтап, қауіптің алдын алу.
Қоршаған орта мен адам өміріне зақым түсіру ықтималдығын төмендету үшін жас мамандар өздері құрастырған заманауи дрондар мен AI алгоритмдерін пайдаланып, жобаны іске асырған. Осылайда жетілдірілген жүйе арқылы бүгінде елдегі қауіпті төтенше жағдайлардың алдын алу үшін қолданып жүрген дәстүрлі әдістерді жолда қалдырмақ.
FireAI жобасының ерекшелігі – дрондар жинаған ақпаратты AI алгоритмі талдай алады. Зерттеу барысында ормандар, өнеркәсіп орындары және қалалық ландшафттар сияқты өрт қаупі бар аймақтарда ажыратымдылығы жоғары камералар мен дрондар орналастырылады. Осылайша дрондар осы аумақтардың үстінен ұшып, үздіксіз суретке түсіру арқылы қоршаған орта туралы деректерді жинайды. Жасанды интеллектің алгоритмдері жиналған ақпаратты өңдеу арқылы түтін белгілерін анықтап, тиісті мекемелерге ақпарат пен сигналдар жіберіп отырады.
FireAI жобасы қазіргі уақытта AstanaHub-тың қолдауымен дамып келеді. Одан бөлек жоба өз технологиясын қолданыстағы жүйелерге үздіксіз интеграциялау үшін Іле-Алатау мемлекеттік ұлттық табиғи паркімен тығыз жұмыс жасап келеді.
Инновациялық жобалардың озық үлгісі ретінде FireAI стартапы – кері байланыс пен ресурстарды тиімді қамтамасыз ету арқылы тілсіз жауды жедел анықтап, адам мен табиғаттың өмірін сақтап қалмақ.