RUS
Бірден екі әйел алған жігіттің видеосы наурызда әлеуметтік желілерде тарап, қызу талқыға түскен болатын. Көптеген адам бұл жай хайп деп, сенбеген еді.
Өзін Ержан мырза деп атайтын жігіттің екі әйелінің бірі болған Фариза хабарласып, бар жағдайды түсіндіріп, көмек сұрады. Айтуынша, Фариза бүгінде ол үйден кетіп қалған. Ал бастапқыда күйеуі тағы бір әйел әкелетінінен бейхабар болған екен.
Негізі біз екеуміз үйленбек болғанбыз. 16 наурызда «тәтті шай» болды. 17 наурызда мені келісіп алып кетті. Сол сәтте көліктен бір қызды көріп қалдым. Бірақ тағы бір әйел әкеле жатыр деген ой болмады. Үйіне барған кезде ол қыздың бала көтеріп қалғанын білдім. Ол кезде қыздың жасы 17-де еді, қазір 18-де. Маған жағдайды түсіндіргеннен кейін мен қалдым. Бірақ үшеуміз туралы әлеуметтік желіге салып жібергенін қаламадым. Біздің өміріміз туралы әлеуметтік желіге салуына қарсы болған кезімде мені ұрып-соғу басталды. Қазір ол үйден қашып кеттім. Ол үйде тұрмаймын, - дейді Фариза.
Оның айтуынша, бұрынғы күйеуі әлі күнге дейін хабарласып, кездесуді сұрайды екен.
«Суреттеріміз бен видеоларымызды әлеуметтік желіге әлі күнге үшеуміз бір үйде тұратындай салып тастайды. Тікелей эфирлерге кіріп, мен әлі сол үйде тұратындай айтып отырады. Бірақ менің ол үйден кеткеніме екі айдай уақыт болды.
Ажырасатындай қалың мал беру деген секілді басқа да дәстүрлер орындалмады. Анасы екеуі келіп,«жағдайым жоқ» деп айтты. Мен екі әйел болып тұрмаймын деген кезде маған пышақ тақап, қорқытты. Мені қорқытып-үркітумен ұстап отырды. Полицияға дейін шағымдандым. Бірақ ешкім ешнәрсе істей алмады. Себебі полицейлер ол оның жеке өмірі болғандықтан ешнәрсе істей алмайтынын айтты. Оқиға Шымкенттің өзінде болған. Қазір ол екінші әйелімен тұрып жатыр, мен оған еш қарсы емеспін, - дейді Фариза.
Фариза бұрынғы күйеуі өзінің суреттерін парақшасына салмаса екен деген өтінішті ғана айтты.
Менің мазамды алмаса деймін. Мен ол үйде тұрмасам да бұрынғы фото, видеоларымызды пайдаланып, әлі күнге дейін үшеуміз бірге бір үйде тұратындай салып жүр. Оның бәрін әлеуметтік желіде оқырман жинау үшін істеп отыр. Мен оған қарсымын. Себебі менің өз өмірім, болашақ өмірім бар шығар? Мені көрген адамдар бетіме басқанын қаламаймын. Әлеуметтік желіде салған суретінде менің көзім көгеріп тұр. Себебі мен оның алдында салма деп қарсы болған едім. Осылайша мені ұрып жіберген. Қазір екінші әйелі де маған хабарласып, мазақтап, күйеуі екеуі бірігіп, әрнәрсе айтады. Осы күнге дейін екі ай бойы ештеңе демедім. Ал қазір шегіне жетті. Жасырын нөмірмен хабарласып, балағат сөздер айтады, - деп қынжылды Фариза.