RUS
Алаяқтар Instagram желісінен аккаунт ашып, туристік агенттік ретінде жалған мәліметтер жүктеп отырған. Сондай-ақ тиімді турлар ұйымдастырып, әртүрлі жеңілдіктер ұсынған.
«34 жасар әйел адам желідегі көп адам жазылған парақшаға еш күдіктенбестен, өз ұялы телефон нөмірін берген. Артынша оған WhatsApp желісінен белгісіз ер адам жазған. Ол өзін турагенттіктің бас директорымын деп таныстырып, екі адамдық тур үшін 480 мың теңге ақысын беруді сұраған», – дейді полиция өкілдері.
Кейіннен ер адам жәбірленушіге карта нөмірін жіберген. Ақша түскен соң қыздың нөмірін қара тізімге қосып, ізім-ғайым жоқ болған. Қазірде қолда бар ақпараттар арқылы құқық қорғаушы органдар қылмыскердің кім екенін анықтап жатыр.
Сондай-ақ қазірде алаяқтар танымал турагенттік сайттар мен парақшаларын айнытпай көшіретінін полиция өкілдері айта кетті. Мұндай жағдайда барынша мұқият болып, алдын-ала төлемді сенімді өкілдерге беру керегін ескертеді. Қазірдің өзінде Павлодар өңірінде жалған турагенттікке алданған 11 адам полицияға шағым түсірген.