Семейдегі қарттар үйі тексеріліп жатыр

Желіде таралған видео мен фотосуреттерде көрсетілген фактілерді жан-жақты тексеру үшін ведомствоаралық мониторингтік жұмыс тобы іске кіріскен.

Тексеруші жұмыс тобы мекеменің қамқорлығындағы азаматтардың жағдайын, тамақтануын, киіммен, медициналық дәрі-дәрмекпен және емдеу шараларымен қамтылуын тексермек.

Сондай-ақ ведомство өкілдері әлеуметтік желіде таралған бейнероликте көрсетілген азаматтар (төсекке таңылған, салмақ жоғалтқан және т.б.) паллиативтік топта, яғни ауыр сырқаты бар, әрі ерекше қамқорлықты қажет ететін бөлімшеде жатқанын ескертті. 

Алдын ала мәліметтер бойынша, олардың денсаулық жағдайы және салмақ жоғалтуы ұзақ уақыт төсекке таңылуымен байланысты болуы мүмкін. Бұл топта жатқан азаматтарға (асқазан қатерлі ісігі, деменция, прогрессивті дисциркуляторлық энцефалопатия, қан айналымының бұзылуы (ОНМК.), оң жақ гемипарез және т. б.) аса ауыр диагноздар қойылған.

«Төсекке таңылған, қозғалуы шектелген науқастардың жағдайын тексеру барысында: көп жатқаннан пайда болатын жаралардың жоқтығы, киімдері, төсек жабдықтары таза екені тіркелді. Бұл азаматтарға нормативтік ережелерге сәйкес техникалық пен тазалық қызметтің уақытылы әрі үнемі жасалғанын көрсетеді», - дейді Абай облысы әкімдігінің баспасөз қызметі.

Ведомствоаралық мониторингтік жұмыс тобының қорытындысына сәйкес тексеру жүргізу және процессуалдық шараларды қабылдау үшін тиісті органдарға жолдамақ.

Мониторингтік топтың жұмысы мен тексерулер кезінде мекеме әкімшілігінің араласуына жол бермеу мақсатында Орталықтың директоры өз еркімен жұмыстан уақытша шеттетілген.